Mitrapalit Tadevuš Kandrusievič čarhovy raz sustreŭsia z žurnalistami. I ja tam byŭ, kavu piŭ, ale tradycyjnymi tartami na hety raz nie častavaŭsia. Bo, jak viadoma, u pravasłaŭnych tolki pačaŭsia Vialiki post.

A kataliki ŭžo rychtujucca da Vialikodnych uračystaściaŭ, tamu im dy padrychtoŭcy da ich była jak raz i pryśviečana sustreča.

Jak akazałasia, i na hety raz nie abydziecca biez aryhinalnych rečaŭ, na jakija taki ščodry novy mitrapalit. Na Rastvo kataliki ŭpieršyniu sustrakali śviata pad fiejervierk, a Palmavaja niadziela budzie z sapraŭdnym asłom. Bo, jak viadoma, mienavita na aśle ŭvajšoŭ Zbaŭca ŭ Ijerusalim. Asła ŭ Miensku nie znajšli, pryviazuć až z Dudutak. Dla jaho budzie pierad katedraj zrobleny specyjalny zahon, tak što možna pryjści pahladzieć u niadziel na žyvuju istotu. Navat, jak ja zrazumieŭ, dzieci zmohuć na im pakatacca. Planujecca ŭdzieł asła i u ŭračystaj pracesii, ale pakul nie znajšoŭsia čałaviek, jaki b pahadziŭsia vykanać rolu Chrysta. Usie ličać siabie niedastojnymi, i heta naturalna.

“Tadevuš Kandrusievič - talenavity pijarščyk”, - skazała potym adna z udzielnic sustrečy. I sapraŭdy, šmat što ŭ katalikoŭ zaraz robicca ŭpieršyniu. Chtości źviarnuŭsia da mitrapalita z pytańniem nakont taho, što ž jašče nas čakaje. Vyśvietliłasia, što i praŭda – što tam asioł... na nastupnyja Kalady čakajucca viarbludy! Bo mienavita na viarbludach, jak ličycca pryjechali pakłanicca Zbaŭcu vałchvy z uschodu...

A, darečy, što tyčycca asła, to zvyčaj padobny byŭ i ŭ pravasłaŭnych. Moža nie ŭsiudy, ale ŭ Maskvie ŭ 16-m stahodździ było tak zvanaje “šiestvije na oślati” .

Asabliva ŭračysta heta rabiłasia pry patryjarchu Nikanie, jaki ličyŭsia tady amal što roŭny z carom. I na Vierbnuju niadzielu jon sadziŭsia na asła, jakoha car, jaki išoŭ pobač pieški, trymaŭ za vuzdečku. Tut, miž inšym, chavaŭsia hłyboki sens tak zvanaj “symfonii” pamiž Carkvoj i dziaržavaj. Mienavita ŭ tym varyjancie, u jakim jaho razumieŭ patryjarch Nikan. Zrazumieła, caram takaja simfonija z uchiłam ad zvyčajnaha cezarapapizma da papacezaryzmu była nie zusim pa dušy, i toj ža Alaksiej Michajłavič trymaŭsia, trymaŭsia, ale nie vytrymaŭ. A jahony syn Piotr Pieršy zusim hety zvyčaj skasavaŭ jak dla cara źnievažalny. Jak i patryjaršastva navohuł.

Ale sutnaść navat nia ŭ tym, chto na aśle, a chto pobač, a ŭ tym, što Carkva i dziaržava nie pavinny krucicca vakoł adnaho i taho ž asła.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?