Pytańnie ab viartańni ŭ Minsk pasła Złučanych Štataŭ Amieryki pakul nie abmiarkoŭvałasia, paviedamiŭ časovy pavierany ŭ spravach ZŠA ŭ Biełarusi Skot Rołand, adkazvajučy na pytańnie BiełaPAN 19 kastryčnika paśla cyrymonii adkryćcia pamiatnaj doški ab dziejnaści ŭ Biełarusi pieršaj humanitarnaj misii UNRRA.

Skot Rołand, fota ecoidea.by

Skot Rołand, fota ecoidea.by

Rołand taksama paviedamiŭ, što maksimalna pašyryć śpis viz, jakija biełaruskija hramadzianie mohuć atrymać, nie vyjazdžajučy z krainy, ZŠA zmoža tolki paśla paŭnacennaha adnaŭleńnia pracy svajho pasolstva ŭ Biełarusi.

«My raimsia (pa hetym pytańni) z našymi kalehami ŭ Vašynhtonie, — zajaviŭ dypłamat. — My razam vyrašajem, kali ŭ nas buduć [spryjalnyja] umovy dla pašyreńnia hetaha śpisa. U adzin cudoŭny dzień u nas budzie narmalnaje pasolstva i my zmožam zabiaśpiečvać vizami absalutna ŭsich hramadzian Biełarusi. Pakul heta abmiežavanaja kolkaść [viz]».

Jak paviedamlałasia raniej, člen pałaty pradstaŭnikoŭ kanhresa ZŠA ad štata Kalifornija Dana Rorabakier 3 žniŭnia ŭ Minsku na sustrečy z Alaksandram Łukašenkam prapanavaŭ Biełarusi i ZŠA pavysić uzrovień dypłamatyčnaha pradstaŭnictva. Parłamientaryj zajaviŭ, što ZŠA chočuć «prasoŭvać mir i supracoŭnictva ŭ miežach rehijona i pamiž dziaržavami ŭsiaho śvietu», vykazaŭšy nadzieju na toje, što «mirnyja namahańni pačnucca mienavita siońnia i atrymajuć svajo raźvićcio». Na dumku Rorabakiera, pieršym krokam u hetym kirunku moža być pavyšeńnie ŭzroŭniu dypłamatyčnaha pradstaŭnictva i viartańnie pasła ZŠA ŭ Minsk i pasła Biełarusi — u Vašynhton.

Letam minułaha hoda pasolstva ZŠA ŭpieršyniu z 2008 hoda pašyryła śpis vizavych pasłuh dla hramadzian Biełarusi. Tak, sa žniŭnia 2014 hoda pasolstva pačało pryjom zvarotaŭ pa vizy katehoryj F (student), M (student prafiesijna-techničnaj navučalnaj ustanovy) i J (udzielnik prahramy kulturnaha abmienu). U červieni hetaha hoda pasolstva ZŠA stała prymać zajaŭki na praciah najaŭnych i adnaŭleńnie viz, jakija zakončylisia mienš jak čatyry hady tamu.

Клас
Панылы сорам
Ха-ха
Ого
Сумна
Абуральна