Pry padliku hałasoŭ naziralniki pavinny bačyć kožny ŭličany biuleteń. Ab hetym zajaviŭ kiraŭnik nahladalnaj misii Biuro pa demakratyčnych standartach i pravach čałavieka ABSIE Žak For.
«Kali ja kažu «pavinny bačyć», ja maju na ŭvazie fizična kožny biuleteń, — padkreśliŭ jon. — Zatym kopija pratakoła padliku hałasoŭ pavinna być nieadkładna raźmieščana na došcy ź infarmacyjaj na vybarčym učastku. Naziralniki pavinny atrymać zavieranuju kopiju hetaha pratakoła. Zatym vyniki z kožnaha vybarčaha ŭčastka treba apublikavać, naprykład, na sajcie Centrvybarkama. Takim čynam, u naziralnikaŭ, jakija atrymali pratakoł, budzie mahčymaść paraŭnać apublikavanyja vyniki i paćvierdzić ich dakładnaść. Tak pavinna być».
Pavodle słoŭ kiraŭnika BDIPČ ABSIE, padčas ciapierašnich prezidenckich vybaraŭ «byli prykłady, kali na vybarčych učastkach padlik hałasoŭ pravodziŭsia mienavita tak». «Adnak jość procilehłyja prykłady, i, na žal, ich značna bolš, kali padlik nie pravodziŭsia ŭ adpaviednaści z rekamiendacyjami», — dadaŭ For.
Jon adznačyŭ, što Centrvybarkam pavinien dać staršyniam učastkovych kamisij «vielmi vyraznyja i zrazumiełyja instrukcyi» nakont taho, što naziralniki pavinny mieć mahčymaść bačyć praceduru padliku hałasoŭ.
Tyja niešmatlikija pazityŭnyja prykłady, kali naziralnikam dazvolili sačyć za padlikam hałasoŭ, pakazvajuć, što «kali budzie palityčnaja vola, to Centrvybarkam moža stvaryć absalutna prazrystyja i zrazumiełyja praviły dla kamisij ab tym, kab dazvolić takoje nazirańnie», ličyć For.
Kažučy pra zafiksavanyja vypadki z prykmietami ŭkidvańnia biuleteniaŭ, jon adznačyŭ, što karotkaterminovymi naziralnikami było zafiksavana vosiem vypadkaŭ, ź ich piać — padčas nazirańnia za padlikam hałasoŭ, dva — u dzień hałasavańnia i adzin padčas daterminovaha hałasavańnia.
«Heta kankretnyja zadakumientavanyja vypadki, na žal, — skazaŭ kiraŭnik misii BDIPČ. — Takija vysnovy byli zroblenyja na padstavie ŭbačanaj kipy nie składzienych biuleteniaŭ u skryniach dla hałasavańnia, u toj čas jak bolšaść biuleteniaŭ byli pa-roznamu składzienyja. U druhim vypadku była zaŭvažanaja kipa składzienych razam biuleteniaŭ (prykładna dvanaccać-piatnaccać), što taksama vyklikaje peŭnuju zakłapočanaść. Byli padazreńni pra mahčymaje ŭkidvańnie ŭ šerahu vypadkaŭ, kali pieranosnyja skryni dla hałasavańnia byli raśpiačatanyja».
Naziralniki, pavodle słoŭ Fora, zaŭvažyli, što hetyja biuleteni terytaryjalnyja vybarčyja kamisii padčas padliku hałasoŭ ličyli na karyść dziejnaha prezidenta.
«Chacieŭ by jašče dadać, što ŭ našaj papiaredniaj spravazdačy havorycca, što padlik atrymaŭ niehatyŭnuju acenku naziralnikaŭ na 30% vybarčych učastkaŭ, na jakich pravodziłasia nazirańnie, što i ŭkazvaje na značnyja prablemy. Praces padviadzieńnia vynikaŭ hałasavańnia byŭ acenieny jak niehatyŭny i nieprazrysty prykładna ŭ 25% terytaryjalnych vybarčych kamisij, dzie ažyćciaŭlałasia nazirańnie», — adznačyŭ kiraŭnik nahladalnaj misii BDIPČ ABSIE.
