Jeŭrakamisija (JEK) pryniała siońnia płan dziejańniaŭ pa ŭzmacnieńni biaśpieki palotaŭ paśla katastrofy samalota hiermanskaj avijakampanii Germanwings u Francyi, paviedamiła pres-słužba JEK.
«Siońnia Jeŭrapiejskaja kamisija zrabiła jašče adzin krok na šlachu da biaśpiečnaj avijacyi, apublikavaŭšy płan dziejańniaŭ pa realizacyi rekamiendacyj, raspracavanych u lipieni rabočaj hrupaj pad kiraŭnictvam Jeŭrapiejskaha ahienctva avijacyjnaj biaśpieki (EASA) u suviazi z krušeńniem samalota Germanwings», — havorycca ŭ zajavie JEK.
Płan składajecca z čatyroch častak, što datyčacca palotaŭ, lotnaha składu, infarmacyjnych technałohij i abarony asabistych danych piłotaŭ. Pry hetym padkreślivajecca, što płan dziejańniaŭ jašče nie zavieršany i budzie dapracavany da kanca 2016 hoda.
Pasažyrski samalot A320 biudžetnaj kampanii Germanwings, daččynaha pradpryjemstva Lufthansa, jaki lacieŭ rejsam Barsiełona — Dziusieldorf, raźbiŭsia 24 sakavika 2015 hoda ŭ francuzskich Alpach pa vinie druhoha piłota Andreasa Łubica. Zhodna z zaklučeńniem śledstva, jon naŭmysna nakiravaŭ łajnier u schił hary z-za svaich prablem psichičnaha i psichałahičnaha charaktaru. Na borcie samalota znachodzilisia 150 čałaviek: 144 pasažyry i šeść členaŭ ekipaža — usie jany zahinuli.
