Lidar Abjadnanaj hramadzianskaj partyi Anatol Labiedźka padčas sustrečy z Uładzimiram Niaklajevym u kafe «Sałodki falvarak» vyjaviŭ u survetnicy «žučok» dla prasłuchoŭvańnia. Śpiecyjalist pa elektronnaj technicy detalova daśledavaŭ pryładu i pryjšoŭ da vysnovy, što heta dyktafon, pryčym zrobleny samatužnym sposabam.
Labiedźka: u «Sałodkim falvarku» i raniej mianiali survetnicu na maim stale
16 kastryčnika Anatol Labiedźka płanavaŭ sustrecca ŭ kafe z Uładzimiram Niaklajevym i Mikałajem Statkievičam. «Vidavočna, što prasłuchoŭvalisia našy telefony, bo miesca sustrečy my nie abhavorvali. Było skazana: dzie minuły raz», — adznačaje palityk.
Užo na ŭvachodzie jon źviarnuŭ uvahu, što ubačyŭšy jaho, barmen źmianiŭsia ŭ tvary, pačaŭ niervavacca. Potym aficyjantka źmianiła na stale survetnicu, choć papiaredniaja była poŭnaj.
«Viadoma, mianie heta naściarožyła, — uspaminaje Labiedźka. — Ja adrazu zhadaŭ, što i raniej u hetaj kaviarni, kali ja prychodziŭ, adrazu ž mianiali survetnicu na stale. Tamu ja vyrašyŭ pasprabavać jaje raskrucić. Unutry vyjaviŭ «žučok».
Palityk nie staŭ padymać šum, značna važniej, paličyŭ jon, vynieści z saboj prasłuchoŭvalnuju pryładu. Na dniach jon maje namier źviarnucca ŭ Hienieralnuju prakuraturu. Svaje podpisy pad zajavaj hatovyja pastavić taksama Niaklajeŭ i Statkievič.
«Pa-pieršaje, my chočam vyśvietlić, ci była sankcyja prakurora na prasłuchoŭvańnie našych mabilnych telefonaŭ, — kaža lidar AHP.— Pa-druhoje, kali takaja sankcyja była, to jakija padstavy dla prasłuchoŭvańnia. Kali prakuratura dazvołu ŭsio ž taki nie davała, my patrabujem raspačać kryminalnuju spravu pa fakcie niezakonnaha prasłuchoŭvańnia i ŭmiašańnia ŭ asabistaje žyćcio».
Ekśpiert: miechanizm dla zapisu hołasu dastali z asadki-dyktafona
Śpiecyjalist pa elektronnaj technicy Juryj Kitajeŭ, vyvučyŭšy znachodku Labiedźki, pryjšoŭ da vysnovy, što heta zapisvajučaja, a nie pieradavalnaja pryłada.
«Bo tut adsutničaje antena, - kaža jon. - Na pryładzie jość knopka, jakaja ŭklučaje zapis. Dalej USB-port, praź jaki hety zapis možna potym pieradać na kampjutar. Ničoha składanaha ŭ tym, kab sabrać taki miechanizm, niama. Chutčej za ŭsio, vykarystany detali z tak zvanaj «špijonskaj asadki» — heta dyktafon, umantavany ŭ šarykavuju asadku. Košt takoj pryłady na kitajskich sajtach — kala 10 dalaraŭ».
Śpiecyjalist kaža, što sabrać takuju pryładu moža navat školnik, jaki cikavicca radyjoelektronikaj.
Pa bazie Datasheetcatalog.com možna prabić ŭsie elemienty zapisvajučaj pryłady, na jakich jość sieryjny numar. Adnak u vypadku z survetnicaj Labiedźki, pošuk nie daŭ vyniku. Fłeška z survetnicy vyznačajecca na kampjutary, adnak adkryć pryładu niemahčyma — patrabujecca śpiecyjalny drajvier.
Pa słovach Juryja Kitajeva, sučasnyja zapisvajučyja pryłady mohuć być jašče mienš, čym u vypadku z survetnicaj: «Heta moža być navat zapanki, u jakuju ŭmantujucy nie tolki dyktafon, ale jašče i kamieru».
Darečy, heta nie pieršy vypadak, kali Anatol Labiedźka vyjaŭlaje zapisvajučuju pryładu. «Hadoŭ vosiem nazad niešta padobnaje znajšli ŭ mianie doma. Pryłada była zamacavana ŭ ščytku elektrasuviazi. Ekśpiertyza pakazała, što fiksavaŭsia huk u majoj kvatery», — raspavioŭ lidar AHP
