Vypusk pieršaha multymiedyjnaha adukacyjna-zabaŭlalnaha časopisa «Muziejnyja vandroŭki» dla dziaciej i padletkaŭ arhanizavali Nacyjanalny histaryčny muziej (NHM) Biełarusi i mabilny apieratar velcom.
Prezientacyja pieršaha numara adbyłasia 20 kastryčnika ŭ Minsku ŭ miežach adkryćcia sumiesnaha prajekta «Muziej dzieciam z velcom». Z «Muziejnymi vandroŭkami» možna aznajomicca na sajcie NHM abo spampavać jaho — viersija adaptavanaja dla vykarystańnia na mabilnych pryładach.
Časopis zasnavany na ŭłasnych muziejnych kalekcyjach, paviedamiła žurnalistam kuratar prajekta, mastactvaznaŭca, navukovy supracoŭnik adździeła muziejnych kamunikacyj NHM Darja Astrahałovaja. «U XXI stahodździ muziej pavinien vychodzić na novyja ŭzroŭni kamunikacyi z naviedvalnikami, u tym liku z dapamohaj ličbavych technałohij, — adznačyła jana. — Niahledziačy na toje što časopis aryjentavany na dziaciej małodšaha i siaredniaha ŭzrostu, jon budzie taksama cikavy i ich baćkam — u nas atrymaŭsia siamiejny pradukt».
Pieršy numar, jaki vyjšaŭ na 26 staronkach, całkam pryśviečany eposie Siaredniaviečča, temie rycarstva i šlachiectva ŭ Biełarusi. Asablivaściu časopisa stała toje, što niekatoryja teksty supravadžajucca interaktyŭnymi materyjałami. Tak, naprykład, u artykule «Chto takija rycary?» raźmieščanaja repradukcyja pałatna XVI stahodździa «Bitva pad Oršaj» nieviadomaha aŭtara. Jaho detalovy prahlad adkryvaje aŭdyjarolik z adnajmiennaj pieśniaj biełaruskaha kalektyvu siaredniaviečnaj muzyki «Stary Olsa».
Druhi numar «Muziejnych vandrovak» płanujecca vypuścić 1 śniežnia.
U miežach sumiesnaha prajekta Nacyjanalny histaryčny muziej i velcom stvaryli novuju interaktyŭnuju muziejna-paznavalnuju prastoru, u jakoj buduć prachodzić tearetyčnyja i praktyčnyja zaniatki, pryśviečanyja historyi, tradycyjam i kultury Biełarusi. Akramia taho, mabilny apieratar dapamoh muzieju madernizavać tematyčnuju dziciačuju zału, jakaja madeluje praces archieałahičnych raskopak.
