U Viłsanaŭskim centry ŭ Vašynhtonie byłaja kandydatka ŭ prezydenty Taćciana Karatkievič paŭdzielničała ŭ sustrečy z amerykanskimi ekspertami. U sustrečy taksama braŭ udzieł načalnik jaje vybarčaha štabu Andrej Dźmitryjeŭ i były pasoł ZŠA ŭ Biełarusi Kienet Jałavic.
Na sustrečy Taćciana Karatkievič raskazała pra toje, što jaje kamanda źbirajecca rabić dalej:
«Samaje hałoŭnaje siońnia dla nas — zachavać padtrymku ŭ hramadztvie našych idejaŭ, jakija jość na siońnia, i zrabić tak, kab da 2020 hodu jana zachavałasia i my ŭžo nie startavali z nula, jak u papiarednija kampanii, a ŭžo mieli padtrymku jak lideraŭ, tak i prahramaŭ.
Pieršaje, što my budziem praciahvać — dyjaloh ab tym, jakija mienavita pieramieny nam patrebnyja, bo siońnia ŭžo ŭłada vaŭsiu trubić pra toje, što treba pavažać, ludziej, patrebnyja pieramieny, patrebnyja reformy ŭ ekanomicy. I samaje važnaje nam tut — uziać u hetym aktyŭny ŭdzieł, davać zvarotnuju suviaź.
Mienavita tamu našaja ideja na bližejšy hod — pravodzić ahulnanacyjanalny forum «Za mirnyja pieramieny», dzie my budziem abmiarkoŭvać usie hetyja realnyja kroki, jakija patrebnyja siońnia ŭ ekanomicy, kultury, adukacyi, medycynie, sacyjalnaj padtrymcy, i davodzić heta da miascovych i respublikanskich uładaŭ.
I druhi krok, jaki dla nas vielmi važny ŭ najbližejšaj perspektyvie — parlamenckaja kampanija. My bačym, što hety forum moža dapamahčy stvaryć asnovu dla prahramy našych pretendentaŭ, a taksama budzie raźvivać naš paradak dnia pieramienaŭ. My taksama siońnia razumiejem, što treba zrabić kroki, jakija b zrabili padlik hałasoŭ u parlamenckaj kampanii prazrystym».
Byłaja kandydatka zaznačyła, što, mahčyma, tym, chto naziraje za Biełaruśsiu, zdajecca, što tam ničoha nie adbyvajecca. Jana zapiarečyła:
«My jakraz pryjechali siudy raskazać, što niešta adbyvajecca.
Pieršaje, što ja b chacieła adznačyć — źjaviŭsia novy, dastatkova vialiki płast ludziej, jaki siońnia zacikaŭleny ŭ tym, kab udzielničać u palitycy, zacikaŭleny ŭ tym, kab adbylisia pieramieny, i mienavita hetyja ludzi natchniajuć nas na našu dziejnaść.
Za hetuju kampaniju nam udałosia sfarmavać u ludziej patrebu cikavicca palitykaj, udzielničać u pryniaćci rašeńniaŭ».
Na sustrečy prysutničaŭ pavierany ŭ spravach Respubliki Biełaruś u ZŠA Pavieł Šydłoŭski. Jon uziaŭ słova i pachvaliŭ Tacianu Karatkievič, za toje, što jana praviała svaju kampaniju «hodna».
«Ja vielmi rady, što Taćciana Karatkievič siońnia tut z nami, — cytuje jaho ŭ svaim fejsbuku były supracoŭnik MZS Biełarusi Valer Kavaleŭski. — Na maju dumku, jana praviała svaju kampaniju z taktam i hodnaściu. Jana dadała prystojnaści i hodnaści prezidenckaj kampanii ŭ Biełarusi».
Prafiesijny dypłamat z bolš čym 20-hadovym stažam, Šydłoŭski pryznaŭsia, što ŭ jaho nie tak dobra atrymlivajucca publičnyja vystupy jak u Taćciany Karatkievič i praciahnuŭ svoj vystup, čytajučy padrychtavany tekst: «Kandydaty mieli mahčymaść vykarystoŭvać svaje ŭłasnyja resursy i achviaravańni dla praviadzieńnia kampanii. Svabodny dostup da dziaržaŭnych ŚMI byŭ pradstaŭleny na roŭnaj asnovie biez prymianieńnia cenzury, što ŭdzielniki vybaraŭ vitali. Samaje hałoŭnaje, zaklučyli naziralniki, što kampanija i dzień hałasavańnia prajšli mirna».
«Ja dumaju, što paśla vybaraŭ pačałasia novaja era ŭ suvierennym raźvićci našaj krainy. Ja hanarusia adznačyć, što my na samaj spravie razarvali zahannaje koła i, u adroźnieńnie ad papiarednich vybaraŭ, nie adbyłosia kałapsu ŭ adnosinach z Zachadam paśla vybaraŭ. Mahu skazać z usioj ščyraściu, što budučynia adnosin z ZŠA ŭsialaje nadzieju. Pierad nami adkryvajecca šyrokaje pole mahčymaściaŭ, i my možam sami farmiravać budučyniu».
«Urad Biełarusi i ja asabista budziem rabić usio ŭ našych siłach, kab stali praŭdaj słovy Taćciany Karatkievič ab adnaŭleńni paŭnavartasnych dypłamatyčnych adnosin i ambasady adnavili pracu ŭ poŭnym składzie».
Andrej Dźmitryjeŭ u adkaz na vystup Šydłoŭskaha pažartavaŭ: «Vam varta ŭdzielničać u vybarach z takoj pramovaj!» (You should run with this speech)