Apieratyŭna-analityčny centr pry prezidencie Biełarusi pryniaŭ rašeńnie pazbavić kampaniju «Mabilny servis» licenzii na prava ažyćciaŭleńnia dziejnaści pa techničnaj i (abo) kryptahrafičnaj abaronie infarmacyi. Pra heta havorycca ŭ paviedamleńni na sajcie AAC.
Dadzienaje rašeńnie rehulatar pryniaŭ paśla pravierki kampanii na pradmiet zachavańnia joju licenzijnych patrabavańniaŭ.
«U chodzie pravierki ŭstanoŭlena, što na datu vykanańnia rabot, što składajuć licenavanuju dziejnaść, u dziaržaŭnych arhanizacyjach u licenzijata nieadnarazova adsutničała ŭzhadnieńnie vykanańnia rabot z AAC, što (…) źjaŭlajecca hrubym parušeńniem zakanadaŭstva ab licenzavańni», — skazana ŭ paviedamleńni.
Kampanija «Mabilny servis» była stvorana ŭ 2001 hodzie. Zaraz źjaŭlajecca adnym z bujnych sistemnych intehrataraŭ ŭ Biełarusi. Siarod asnoŭnych klijentaŭ internet-pravajdary, apieratary kabielnaha telebačańnia i mabilnaj suviazi, banki, šerah dziaržstruktur i prampradpryjemstvaŭ. U «Mabilnym servisie» pracujuć bolš za 100 čałaviek.
Važna adznačyć, što kampanija źjaŭlajecca lidaram pa pastaŭkach abstalavańnia Cisco na biełaruskim rynku. Sumiesna realizavany šerah značnych prajektaŭ u maštabach krainy, vynikaje z prezientacyi na sajcie hetaj transnacyjanalnaj kampanii. Pabudavana respublikanskaja sietka pieradačy dadzienych na 100 Hbit interfiejsach z vykarystańniem Cisco. Stvorana najbujniejšaja Wi-Fi-sietka ŭ Biełarusi na bolš za 2000 kropak. U 2014 hodzie raspracavana i realizavana kancepcyja Adzinaj sistemy videanazirańnia Minska.
Na bazie abstalavańnia Cisco pabudavanyja najbujniejšyja apieratary ličbavaha telebačańnia ŭ Biełarusi. Bolš za 80% abanienckaj bazy krainy atrymlivajuć pasłuhi ad hetych apierataraŭ.
«Mabilny servis» zdaŭ «pad kluč» kompleksnyja IKT-rašeńni (prajektavańnie-pastaŭka abstalavańnia - mantaž - puskanaładačnyja pracy - absłuhoŭvańnie) na «Čyžoŭka-Arenie» i «Barysaŭ-Arena», u novaj štab-kvatery NAK, haścinicy «Viktoryja Alimp», akvapark «Lebiadziny»i centry frystajła.
