Na dolu Apple prypadaje 37% biełaruskaha rynku aficyjnaha prodažu smartfonaŭ u siehmiencie premium-kłasa koštam ad 400 dołaraŭ ZŠA i vyšej u ekvivalencie, paviedamiła kiraŭnik prajektaŭ Apple Premium Reseller u krainach SND i Hruzii Nadzieja Damarad 23 kastryčnika ŭ Minsku na prezientacyi novaha praduktu kampanii — smartfona iPhone 6s. Jaho aficyjny prodaž startavaŭ u Biełarusi apoŭdni 23 kastryčnika.
cnet.com
Varta adznačyć, što tradycyjna start prodažu novaha iPhone vyklikaje vialiki ažyjataž, prychilniki vystrojvajucca ŭ čerhi, časam navat za niekalki sutak, adnak u Biełarusi 23 kastryčnika hetaha zaŭvažana nie było. Na miascovym rynku košt iPhone 6s pačynajecca ad 18 młn rubloŭ. A, naprykład, iPhone 6s Plus z pamiaćciu 128 HB abydziecca pakupniku ŭ 26 młn rubloŭ.
iPhone 6s staŭ prykmietna palepšanaj viersijaj smartfona iPhone 6, jakaja atrymała šerah udaskanaleńniaŭ. Samaje hałoŭnaje ź ich — technałohija 3D Touch, jakaja dazvalaje ŭzajemadziejničać z pryładaj na novym uzroŭni. Jana raspaznaje siłu naciskańnia na ekran i adkryvaje novyja sposaby dostupu da funkcyj i ŭzajemadziejańnia z kantentam. Aparat atrymaŭ palepšanuju 12-miehapiksielnuju asnoŭnuju kamieru z mahčymaściu zapisu 4K-videa i najnoŭšy pracesar A9.
Adnoj z asnoŭnych ekskluziŭnych funkcyj iPhone 6s i iPhone 6s Plus źjaŭlajecca technałohija Live Photos, jakaja dazvalaje rabić fotazdymki, abjadnanyja ŭ fajł ź nievialikimi videarolikami. Dziakujučy hetamu pry dakranańni fotazdymak na niekalki siekund niby ažyvaje.
Smartfony dastupnyja ŭ čatyroch kolerach: sierabrysty, załaty, «šery kosmas» i «ružovaje zołata». Abjom pamiaci składaje 16, 64 i 128 HB.
U śviecie Apple iPhone 6s i 6s Plus byli aficyjna prezientavanyja šyrokaj publicy 9 vieraśnia hetaha hoda. iPhone 6s staŭ samym paśpiachovym smartfonam u śviecie, tolki za pieršy ŭikend było pradadziena 13 młn. asobnikaŭ.
