Urad i apazicyja dasiahnuli siońnia zhody nakont źmianieńniaŭ u mihracyjnaj palitycy, abjavili pradstaŭniki parłamienckich partyj na śpiecyjalnaj pres-kanfierencyi. Mihracyjnaje ŭpraŭleńnie atrymlivaje prava vydavać biežancam časovaje paśviedčańnie na prava žycharstva terminam na 3 hady zamiest pastajannaha. Vyklučeńnie składuć padletki-mihranty, jakija prybyli ŭ Šviecyju biez supravadžeńnia baćkoŭ, a taksama siemji ź dziećmi.
Damoŭlenaści, jakija składajucca z 21 punkta, datyčacca pryjomu i intehracyi pierasialencaŭ. Pavodle słoŭ ministra pa pytańniach rynku pracy Ilvy Juchansan, metaj damoŭlenaściej stała «naviadzieńnie paradku ŭ krainie» i «źnižeńnie zatrat na pryjom biežancaŭ».
Pahadnieńnie praduhledžvaje i ŭzmacnieńnie patrabavańniaŭ adnosna dachodaŭ tych biežancaŭ, jakija chočuć pryvieźci ŭ Šviecyju svaje siemji. Palityki patrabujuć skaracić terminy razhladu spraŭ pa pradastaŭleńni prytułku mihracyjnym upraŭleńniem, a taksama efiektyvizacyi departacyi pierasialencaŭ, jakim admoŭlena ŭ paśviedčańni na prava žycharstva. Pavodle danych palicyi, u biahučym hodzie šviedskija vartavyja paradku zmahli adpravić na radzimu tolki 12 pracentaŭ biežancaŭ, jakim nie dazvolili zastacca ŭ krainie. U palicyi prosta niama času i resursaŭ aktyŭna zajmacca pošukam mihrantaŭ, jakija ŭciakli ad departacyi. Da taho ž 27 pracentaŭ krain, naprykład, Samali, Afhanistan, Iran, Irak admaŭlajucca prymać nazad pierasialencaŭ, jakich prymusova vysyłajuć.
Usie municypalitety krainy biez vyklučeńnia ciapier buduć abaviazany prymać i raśsialać biežancaŭ, a taksama sačyć za ich bolš chutkim vychadam na rynak pracy.
Partyi tak i nie zmahli pryjści da adzinaha mierkavańnia nakont uviadzieńnia časovaha pahraničnaha kantrolu, jakoha patrabavała Umieranaja kaalicyjnaja partyja, tamu hranicy karaleŭstva zastanucca dla mihrantaŭ adkrytymi.
Zhodna z apublikavanym raniej prahnozam, u 2015-2016 hadach Šviecyja z nasielnictvam 9,8 młn žycharoŭ prymie da 360 tys. biežancaŭ. Heta samy vialiki pakazčyk u Jeŭropie na dušu nasielnictva. Kolkaść dziaciej-mihrantaŭ biez baćkoŭ siarod pierasialencaŭ moža skłaści da 73 tys. čałaviek. Ale mnohija ekśpierty sumniavajucca ŭ sapraŭdnaści ŭzrostu hetych padletkaŭ, jakija «stračvajuć» dakumienty pry pierachodzie hranicy. Viadoma, što maładym ludziam da 18 hadoŭ lahčej atrymać prytułak u Šviecyi.
