Staršynia jepiskapatu afrykanskaj krainy Małavi raspavioŭ u efiry italjanskaha telebačańnia pra svoj los.
Arcybiskupa Tomasa Łuku Msusa z Małavi zaprasili ŭ efir kanała Tv2000 raspavieści pra Sinod Biskupaŭ, jaki prachodzić u Vatykanie, adnak niespadziavana razmova pierajšła na historyju naviartańnia samoha ijerarcha.
«Ja pachodžu z musulmanskaj siamji, moj baćka byŭ imamam i adnym z najbolš strohich u krainie. Ale adnojčy, kali ja ŭžo byŭ katalickim biskupam, pryjšoŭ da mianie, upaŭ na kaleni i skazaŭ: «Chaču achryścicca»», — raspavioŭ arcybiskup.
«Ja paprasiŭ ab chroście, kali mnie było 12 hadoŭ. Jašče raniej źbiahaŭ z domu, bo ŭ siamji pačuvaŭsia čužym i prynižanym. Chavaŭsia ŭ bližejšym katalickim kaściole, dzie misijanierami byli śviatar ź Italii i manachini.
Jany byli z horada Bierhama. Zaŭvažyli, što časta siadžu zzadu, i zacikavilisia mnoj. Prytulili i dali mnie luboŭ, jakoj ja nie mieŭ u siamji. Praź niekalki hadoŭ ja staŭ katalickim śviatarom biez zhody baćki i siamji. Doma mianie praklali», — kazaŭ hość.
Adnak ź ciaham času naviarnułasia ŭsia siamja budučaha ijerarcha, a apošnim — baćka.
«Jon pryjšoŭ da mianie ŭ 2004 hodzie. Ja byŭ uzrušany, kazaŭ jamu, što navat niechryścijanin moža paźbiehnuć piekła. Ale jon nastojvaŭ, što choča stać katolikam, bo bačyć, što katoliki ŭ našaj krainie žyvuć u zhodzie i spakoi, stvarajuć siemji, jakija niasuć bližnim ščaście, supolnaści ŭzajemnaj dapamohi».
Baćka arcybiskupa achryściŭsia, uziaŭšy imia Abraham. Razam z synam jon zasnavaŭ fond, u jakim razam pracujuć katoliki i musulmanie.
