Praz šeść miesiacaŭ ZŠA aceniać situacyju ŭ Biełarusi i prymuć rašeńnie nakont dalejšaha losu sankcyj suprać dzieviaci biełaruskich pradpryjemstvaŭ, zajaviła namieśnik pamočnika dziaržsakratara ZŠA pa spravach Jeŭropy i Jeŭrazii Brydžyt Brynk 5 listapada na sustrečy z žurnalistami ŭ Minsku.

Adkazvajučy na pytańnie, jak buduć dziejničać ZŠA, kali situacyja za paŭhoda ŭ Biełarusi nie palepšycca, ale i nie pahoršycca, jana skazała: «Nie mahu pradkazać budučyniu. Źmiakčeńnie sankcyj adbyłosia ŭ adkaz na vyzvaleńnie palitviaźniaŭ. Praz šeść miesiacaŭ ZŠA ŭvažliva buduć aceńvać situacyju całkam i ŭ sukupnaści ŭsie faktary. Rašeńnie budzie prymacca na asnovie hetaha analizu». 

Jana padkreśliła, što isnuje mahčymaść dla palapšeńnia i narmalizacyi adnosin pamiž Biełaruśsiu i ZŠA. Vyzvaleńnie i źmiakčeńnie sankcyj jana nazvała «ŭzajemnymi pazityŭnymi krokami». Čynoŭnik Dziarždepartamienta vykazała nadzieju, što ruch u hetym napramku praciahniecca. 

U svaju čarhu namieśnik pamočnika dziaržsakratara pa demakratyi, pravach čałavieka i pracy Robiert Biarščynski zaznačyŭ, što ZŠA hatovyja da dalejšych pazityŭnych krokaŭ, ale kali situacyja z pravami čałavieka i demakratyjaj u Biełarusi pahoršycca, dziejańnie sankcyj moža adnavicca ŭ poŭnaj miery. 

Nahadajem, 29 kastryčnika Ministerstva finansaŭ ZŠA da 30 krasavika 2016 hoda častkova źmiakčyła sankcyi adnosna šerahu biełaruskich pradpryjemstvaŭ. U sankcyjny śpis uvachodziać «Biełaruski naftavy handlovy dom», kancern «Biełnaftachim», Belneftekhim USA Inc., AAT «Biełšyna», AAT «Hrodna Azot», AAT «Hrodna Chimvałakno», AAT «Łakafarba», AAT «Naftan» i AAT «Połack-Škłovałakno». Usia ŭłasnaść hetych pradpryjemstvaŭ zastajecca zabłakiravanaj, ale tranzakcyi dazvolenyja. Pry hetym, kali suma ździełki pieravyšaje 10 tys. dołaraŭ, hramadzianie ZŠA abaviazanyja paviedamlać upraŭleńniu kantrolu zamiežnych aktyvaŭ Dziarždepartamienta. Sankcyi byli ŭviedzienyja na padstavie ŭkaza prezidenta ZŠA Džordža Buša ad 16 červienia 2006 hoda ŭ suviazi z parušeńniem pravoŭ čałavieka ŭ Biełarusi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?