Słužba biaśpieki Ukrainy zatrymała byłoha ministra justycyi krainy Alenu Łukaš, paviedamiła aficyjny pradstaŭnik viedamstva Alena Hitlanskaja.
Na bryfinhu ŭ SBU žurnalistam prademanstravali videazapis, na jakoj Alena Łukaš kaža, što jana dobraachvotna adpraviłasia ŭ hienprakuraturu davać pakazańni.
«Ja ciapier znachodžusia ŭ Kijevie. Nijakaha cisku na mianie nichto nie akazvaŭ. Razmova z supracoŭnikam kontrvyviedki prajšła narmalna i ja dobraachvotna adpraŭlajusia dla dačy pakazańniaŭ usim pravaachoŭnym orhanam, jakija chočuć ad mianie pakazańniaŭ», — kaža Łukaš na videazapisy.
Pa słovach Hitlanskaj, apieratyŭniki dastaŭlajuć Łukaš u hienprakuraturu Ukrainy, «kab pracesualna aformić jaje zatrymańnie ŭ Kijevie».
«Heta było nie apošniaje zatrymańnie, my nie budzie raspaviadać pra detali zatrymańnia», — skazała Hitlanskaja na bryfinhu.
Advakat eks-ministra Andrej Śmirnoŭ raniej zajaviŭ, što jamu nieviadoma, kudy pavieźli Łukaš i dzie jana znachodzicca ciapier.
MUS abjaviła Alenu Łukaš ŭ vyšuk u vieraśni 2015 hoda. Pavodle infarmacyi viedamstva, jaje padazrajuć u ździajśnieńni złačynstva, praduhledžanaha artykułam kryminalnaha kodeksa «prysvajeńnie, rastrata abo zavałodańnie majomaściu šlacham złoŭžyvańnia słužbovym stanoviščam». U pačatku leta hienieralnaja prakuratura abvinavaciła eks-kiraŭnika miniusta ŭ pieravyšeńni paŭnamoctvaŭ i słužbovym padłohu.
Pavodle dadzienych MUS, Łukaš źnikła ź ich pola zroku ŭ kancy lipienia. Łukaš vykonvała abaviazki ministra justycyi ź lipienia 2013 hoda pa studzień 2014 hoda.