Dla vierujučych rasiejcaŭ raspracoŭvajecca admysłovy Wi-Fi. Pra heta raspavioŭ kiraŭnik sakrataryjata mižrelihijnaha savieta Rasii, namieśnik staršyni Sinadalnaha adździeła pa ŭzajemadziejańni Carkvy i hramadstva Ruskaj pravasłaŭnaj carkvy (RPC) śviatar Raman Bahdasaraŭ.
Relihijny Wi-Fi nie prapuścić paviedamleńni ad siektantaŭ abo ekstremistaŭ, infarmacyju ab skažonych faktach historyi i zabłakuje zapyty ab porna.
tass.ru
Biaspłatnyja punkty dostupu buduć raźmieščanyja kala chramaŭ, a taksama na haradskich placoŭkach, papularnych siarod haradžan.
Jak adznačyŭ Bahdasaraŭ, sučasnaje žyćcio prachodzić u infarmacyjnaj prastory, i pravasłaŭnaja carkva, hetak ža jak i inšyja kanfiesii, nie moža zastavacca ŭbaku ad hetaj źjavy. Pry hetym infarmacyjnaja prastora chaatyčnaja, i razam z karysnaj infarmacyjaj jana niasie šmat pahroz dla karystalnika. Naprykład, jaho mohuć zavabić u svaje sietki siektanty abo viarboŭščyki IDzIŁ.
Tamu profilnyja carkoŭnyja struktury, pavodle jaho słoŭ, prapanujuć rasiejcam abaronu ŭ internet-prastory. Miarkujecca, što kamanda śpiecyjalistaŭ budzie «ŭručnuju» adbirać biaśpiečnyja dadzienyja i błakavać niepatrebnuju infarmacyju.
«My nie kažam, što ŭ pravasłaŭnym internecie buduć tolki propaviedzi patryjarcha i pravasłaŭnyja sajty, — skazaŭ Bahdasaraŭ. — Tam budzie šmat usiaho, u tym liku narmalnaje kino — naprykład, filmy «Alaksandr Nieŭski», «Stomlenyja soncam» i mnohija inšyja ajčynnyja i zamiežnyja karciny, jakija pryščaplajuć ludziam pravilnyja kaštoŭnaści, takija jak tradycyjnaja maralnaść, patryjatyzm, abarona siamji i dziaciej. I kab nie karmić trolaŭ, jakija adrazu ž pačnuć kryčać, što my abmiažoŭvajem ludziej u pravach, ja adznaču: my nikoha nie abmiažoŭvajem. Nie chočaš karystacca pravasłaŭnym internetam — karystajsia zvyčajnym».
Padobnyja technałohii ŭ Runecie ŭžo jość. Naprykład, isnuje niekalki pravasłaŭnych pošukavikaŭ, u tym liku rublev.com (słohan «Iŝitie i obriaŝietie»). Na zapyt «zabojstva» vydajecca zapaviedź «nie zabivaj», na zapyt «hvałt» — «malitvy žančyn pra vyratavańnie ad hvałtu». Kali nabiraješ słova «porna», pošukavik pakazvaje zapaviedź «nie raspuśničaj», słova «seks» — pavučalny tekst, dzie havorycca, što «straści, kali ź imi nie zmahacca, pryvodziać da hrachoŭ». Łasunam tam šukać taksama niama čaho — na zapyt «dastaŭka picy» vychodzić navina: «Papa Francišak pryznaŭsia, što sumuje pa piceryjach i prahladzie futbolnych matčaŭ».
Viadučy juryskonsult fondu «Instytut ekanomiki horada» Dźmitryj Hardziejeŭ adznačyŭ, što kali karystalnikaŭ nie papiaredzić zahadzia, što im prapanujuć nie zvyčajny Wi-Fi, a relihijny, heta moža ŭvieści ich u zman, i ŭ vyniku pasłuha im nie spadabajecca.
«Da taho ž ja liču, što takaja pasłuha — nie abarona viernikaŭ, a vyraz niedavieru im — niedavieru ŭ tym, što jany, darosłyja ludzi, zmohuć sami razabracca, što takoje dobra, a što drenna».
