Maskva pačała «maštabnuju i sistemnuju» viarboŭku bajevikoŭ z Danbasa dla vajennych dziejańniaŭ u Siryi, napisaŭ u svaim błohu ŭčora viadomy ŭdzielnik rasijskaj ahresii suprać Ukrainy.
«Vajavać u Siryju z Danbasa pajechała ŭžo da 700 čałaviek», — paviedamlaje Alaksandr Žučkoŭski — «daniecki apałčeniec» z rasijskim pašpartam i publicyst, jakoha drukujuć mnohija rasijskija vydańni.
Jon piša, što nabor dobraachvotnikaŭ idzie arhanizavana i centralizavana — pa linii śpiecsłužbaŭ.
«Kab schilić ich da «kamandziroŭki» u Siryju, abiacajuć vydaču rasijskaha hramadzianstva, prystojnyja zarobki (ad 90 da 250 tysiač rasijskich rubloŭ) i pierakonvajuć, što tut bolš niama što rabić, na Danbasie vajna skončyłasia, ciapier za intaresy Rasii zmahajucca ŭ Siryi», — paviedamlaje Žučkoŭski.
U pieršuju čarhu jeduć «pasijanaryi vajny», jakija byli ŭ Čačni, Juhasłavii ci na tym ža Bližnim Uschodzie, takich ludziej u «apałčeńni Navarosii» niamała, dadaje jon.
Pa jahonych słovach, suchaputnaja apieracyja RF u Siryi faktyčna ŭžo daŭno pačałasia, i ŭdzielničajuć u joj nie tolki dobraachvotniki, ale i rasijskija vajskoŭcy.
Žučkoŭski — papularny rasijski błohier i žurnalist, artykuły jakoha pieradrukoŭvajucca jak anłajn-ŚMI šavinistyčnaj skiravanaści, takimi jak «Sputnik i pohrom», hetak i prosta prapucinskimi apn.ru, rus-obr.ru, vz.ru.
Viasnoj jon zaklikaŭ likvidavać Ukrainu i Biełaruś, asabista abražajučy Alaksandra Łukašenku.
Treba brać pad uvahu, što choć Žučkoŭski realnaja asoba, ale jahony błoh moža vykarystoŭvacca dla tranślacyi dezynfarmacyi.
Amal adnačasova z pastom Žučkoŭskaha pra viarboŭku ŭ Siryju ŭ supołcy biełaruskich dobraachvotnikaŭ, jakija zmahajucca na ŭkrainskim baku, źjaviłasia paviedamleńnie pra načny boj kala vioski Piaski.
