9 listapada ŭ Homielskim abłasnym sudzie pačaŭsia razhlad kryminalnaj spravy ab zabojstvie troch čałaviek.
U kastryčniku 2014 hoda ŭ lasnym masivie blizu Žłobina byŭ znojdzieny zhareły aŭtamabil z frahmientami troch abharełych cieł. Była raspačataja kryminalnaja sprava. U žorstkim zabojstvie muža, žonki i ich starejšaha syna abvinavačvajucca małodšy syn i sužycielka zabitaha.
Pavodle papiaredniaj infarmacyi, u cyhanskaj siamji žyli piać darosłych ź dziećmi — dvoje bratoŭ, ich baćki i niaviestka, žonka starejšaha brata. Pamiž małodšym bratam i niaviestkaj uźnikła suviaź, adnak baćki, daviedaŭšysia ab hetym, vykazali svajo niepryniaćcie hetaj situacyi. Tady maładyja ludzi vyrašyli pazbavicca ad svajakoŭ. Para vyrašyła zabić baćkoŭ i starejšaha brata, advieźci na aŭtamabili ŭ les i spalić, kab schavać ślady złačynstva.
Sudovaje pasiadžeńnie pavodle chadajnictva abvinavačanych projdzie ŭ zakrytym režymie. Abvinavačanyja — Alaksandr i Rubina, abodva 1992 hoda naradžeńnia. Padajučy chadajnictva ab praviadzieńni pracesu ŭ zakrytym režymie, Rubina rastłumačyła prośbu tym, što «heta tyčycca ich asabistaha žyćcia». Alaksandr matyvavaŭ tym, što jon nie moža davać pakazańni ŭ prysutnaści svajakoŭ, chacia jany pryznanyja paciarpiełymi i ŭ lubym vypadku buduć prysutničać na sudzie.
Alaksandr žanaty, u jaho troje niepaŭnaletnich dziaciej, 2009, 2010 i 2011 hadoŭ naradžeńnia. U Rubiny i zabitaha starejšaha brata dvoje dziaciej, 2009 i 2014 hadoŭ naradžeńnia. Nad dziećmi apieku ŭstanaviła maci Rubiny.
Abvinavačanyja raniej nie sudzimyja, majuć adukacyju šeść kłasaŭ.
Paciarpiełymi pryznanyja siastra i brat zahinułych.
