Kiraŭnik Ministerstva zamiežnych spraŭ Biełarusi Uładzimir Makiej pravioŭ pieramovy ŭ Bierlinie. Heta byŭ pieršy za doŭhi čas vizit kiraŭnika MZS u Niamieččynu paśla doŭhaha pieryjadu zamarožvańnia dvuchbakovych adnosin.
Pa źbiehu abstavin napiaredadni vizitu pamior pasoł Biełarusi ŭ Niamieččynie Andrej Hiro. Akurat u dzień vizitu Makieja jaho chavali ŭ Minsku.
Hiro byŭ prychilnikam zbližeńnia Biełarusi i Jeŭrasajuza i šmat rabiŭ dla narmalizacyi biełaruska-niamieckich adnosin.
Były supracoŭnik biełaruskaha MZS Valery Kavaleŭski rezka krytykuje ministra za toje, što jon nie pieranios sustrečy. «Kamanda Łukašenka nikoli nie vyłučałasia ni maralnymi pryncypami, ni vysakarodnaściu, — piša Kavaleŭski, jaki ciapier žyvie ŭ ZŠA. — Uładzimir Makiej dapoŭniŭ hetuju reputacyju novym vyrodlivym žestam».
Kavaleŭski nazyvaje Hiro «adnym z najlepšych dypłamataŭ u historyi krainy za ŭsie časy» i piša: «Hetaja strata — dastatkovaja nahoda adkłaści vizit. Kali ŭ Bierlina jość hatoŭnaść sustrecca, to data ŭžo nie tak važnaja. Pytańnie ŭ čałaviečnaści».
Nie ŭsie ź im pahadžajucca: «Smutak i žalba — heta adno, ale biznes, viadoma, treba praciahvać», — adkazvaje ŭ kamientach Jury Kažura.