Biełaruskija studenty nakiravali ŭ Jeŭrapiejski studencki sajuz zvarot z prośbaj ab salidarnaści.
Zvarot padpisali aktyvisty čatyroch studenckich struktur — «Bractva arhanizataraŭ studenckaha samakiravańnia» (BAS), «Supolnaści biełaruskich studentaŭ», «Studenckaj rady» i «Centra raźvićcia studenckich inicyjatyŭ», a taksama hrupa studentaŭ, jakija vystupajuć suprać płatnych adpracovak.
Jak paviedamiŭ kiraŭnik BAS Alaksandr Łucevič, aŭtary zvarotu paviedamlajuć pra pačatak kampanii pa zbory podpisaŭ studentaŭ, jakija vystupajuć za admienu płatnaj pierazdačy ekzamienaŭ i zalikaŭ va ŭsich VNU Biełarusi. Arhanizatary kampanii płanujuć sabrać jak minimum 10 tysiač podpisaŭ, jakija buduć nakiravany ministru adukacyi Michaiłu Žuraŭkovu.
«My zaklikajem Jeŭrapiejski sajuz i Jeŭrapiejski studencki sajuz vykazać salidarnaść ź biełaruskimi studenckimi aktyvistami, jakija cierpiać ad represij z boku administracyi svaich VNU», — havorycca ŭ zajavie. Jaho aŭtary prosiać Jeŭrapiejski studencki sajuz vystupić z zajavaj ab niedapuščalnaści jakich-niebudź parušeńniaŭ akademičnych svabod i lubych represij u dačynieńni da studentaŭ biełaruskich VNU.
Jak paviedamlałasia raniej, pamiž studentami i administracyjaj BDU razhareŭsia kanflikt z pryčyny ŭviadzieńnia płaty za pierazdaču ekzamienaŭ i zalikaŭ. Studenty hałoŭnaj VNU krainy arhanizavali zbor podpisaŭ pad zvarotam da ministra Žuraŭkova i rektara BDU Siarhieja Abłamiejki suprać zapłanavanaha novaŭviadzieńnia. 11 listapada zvarot pieradali ŭ rektarat BDU, pad im padpisalisia bolš jak 2,5 tysiačy čałaviek, adnak užo 12 listapada ŭ VNU było pryniata pałažeńnie ab apłacie paŭtornaj zdačy ekzamienaŭ i zalikaŭ.
Na kruhłym stale ŭ Minsku 19 listapada inicyjatary zvarotu paviedamili, što na studentaŭ, jakija brali ŭdzieł u zbory podpisaŭ, akazvajecca nacisk. Pavodle ich słoŭ, supracoŭniki adździełaŭ pa vychavaŭčaj i ideałahičnaj pracy vyklikajuć studentaŭ i viaduć ź imi hutarki, paśla jakich maładyja ludzi vymušany admaŭlacca ad aktyŭnych dziejańniaŭ. Takaja situacyja akramia BDU nazirajecca ŭ Biełaruskim dziaržaŭnym piedahahičnym univiersitecie imia Maksima Tanka, dzie studenty taksama ŭźnimali pytańnie pra admienu płaty za pierazdaču ekzamienaŭ.
Adzin sa studentaŭ BDU na ŭmovach ananimnaści raskazaŭ, što studentam, jakija źbirali podpisy, havaryli ab tym, što «jany ŭdzielničajuć u palityčnym žyćci, što za imi chtości staić i płacić za zbor podpisaŭ». Pavodle jaho słoŭ, studentam namiakali, što imi mohuć «zacikavicca orhany». Akramia taho, administracyja BDU zrabiła bolš žorstkim kantrol naviedvalnaści zaniatkaŭ.
«Heta adbyvajecca dla zapałochvańnia studentaŭ. Maładyja ludzi bajacca być adličanymi, bajacca, što ich pryzavuć u armiju. I hety srodak nacisku maje svoj vynik — mnohija z aktyŭnych studentaŭ admovilisia ad udziełu ŭ kampanii», — raskazaŭ surazmoŭca.
