Sud Centralnaha rajona Minska 20 listapada aštrafavaŭ apazicyjnych palitykaŭ Anatola Labiedźku i Viačasłava Siŭčyka na 50 i 60 bazavych vieličyń (9 i 10,8 młn rubloŭ) adpaviedna.
Labiedźka pryznany vinavatym na padstavie č. 3 art. 23.34 KoAP (parušeńnie paradku arhanizacyi ci praviadzieńnia masavych mierapryjemstvaŭ paŭtorna na praciahu hoda) za ŭdzieł u akcyi pamiaci achviar stalinskich represij, jakaja prajšła kala budynka KDB u Minsku 29 kastryčnika.
«Sudździa Viktoryja Šabunia, jakaja sudzić mianie ŭžo treci raz na praciahu miesiaca, zvyčajna, vynosiačy pryhavory, kaža, što jany zasnavanyja na piśmovych materyjałach spravy i pakazańniach śviedak. Ciapier jana navat hetaha nie skazała. Śviedki błytalisia ŭ pakazańniach. Milicyjanier, jaki składaŭ pratakoł, tak i nie zmoh dakazać, što ž supraćzakonnaha ja rabiŭ», — skazaŭ Labiedźka.
Pavodle jaho słoŭ, sudy nad apazicyjnymi aktyvistami ŭ Biełarusi «pastaŭlenyja na kanviejer». «Nijakaj libieralizacyi niama. Heta havoryć ab tym, što nam treba składać svoj biełaruski śpis čynoŭnikaŭ i sudździaŭ, vinavatych u parušeńni zakona i pravoŭ čałavieka. Kali brusielski śpis ciapier znachodzicca ŭ zamarožanym stanie, to nam samim treba pravodzić manitorynh taho, što adbyvajecca ŭ krainie», — adznačyŭ Labiedźka.
Siŭčyk pryznany vinavatym na padstavie art. 23.34. KoAP (parušeńnie paradku praviadzieńnia masavaha mierapryjemstva) za ŭdzieł u akcyjach apazicyi 23 vieraśnia i 4 kastryčnika i art. 17.1 (drobnaje chulihanstva). «Zrazumieła, što heta palityčnaje rašeńnie. Heta paćviardžaje i toje, što sudździa padčas pasiadžeńnia nazvała mianie apazicyjnym palitykam», — paviedamiŭ jon.
