Hrodzienski abłasny sud 20 listapada prysudziŭ 28-hadovaha Ivana Kulaša da śmiarotnaj kary, paviedamlajuć pravaabaroncy. Mužčyna pryznany vinavatym u zabojstvie troch pradavačak u Lidskim rajonie, a taksama ŭ kradziažy i razboi.
Abvinavačvany admoviŭsia dać pakazańni ŭ sudzie, a taksama vystupić z apošnim słovam. Pavodle viersii śledstva, u vieraśni 2013 hoda jon zabiŭ dźviuch žančyn-pradavačak u Lidzie i vykraŭ z mahazina hrošy i tavary na sumu bolš jak 37 młn. rubloŭ (č. 2 art. 205; č. 2 art. 207; č. 3 art. 207; pp. 1, 6, 12 č. 2 art. 139; pp. 6, 8, 16 č. 2 art. 139; č. 1 art. 14; pp. 8, 16 č. 2 art. 139 Kryminalnaha kodeksa).
U listapadzie 2014 hoda, pavodle danych śledstva, padsudny zabiŭ jašče adnaho pradaŭca ŭ Lidskim rajonie — nanios žančynie bolš za 10 udaraŭ siakieraj i vykraŭ z mahazina hrošy i tavary. Akramia taho, Kuleš pryznany vinavatym u zamachu na zabojstva syna pradavački, jaki zaśpieŭ jaho ŭ mahazinie.
Raniej Kuleš byŭ dvojčy sudzimy za kradziež i razboj, a taksama zaviedama łžyvy danos. Na momant uziaćcia pad vartu aficyjna nidzie nie pracavaŭ.
Padčas pieršych dzion sudovaha pasiadžeńnia advakat Mirasłaŭ Karecki adznačaŭ: jaho padabaronny ličyć, što jaho pryhavorać da śmiarotnaj kary, i nie źbirajecca abskardžvać pryhavor. Abaronca prasiŭ sud pryznačyć pakarańnie ŭ vyhladzie 25 hadoŭ pazbaŭleńnia voli, uličvajučy, što Kuleš padpisaŭ jaŭku z pakajańniem i supracoŭničaŭ sa śledstvam.
«Jak by my ni stavilisia da Kulaša, jaho jaŭka z pakajańniem dazvoliła śledstvu raskryć złačynstva ab zabojstvie dźviuch pradavačak u 2013 hodzie. Heta złačynstva na praciahu hoda nie było raskrytaje, i nieviadoma, što było b, kali b Kuleš va ŭsim nie pryznaŭsia», — adznačyŭ abaronca padčas sprečak u sudzie.
Tym nie mienš sudovaja kalehija pad staršynstvam Anatola Zajca paličyła dokazy abvinavačańnia bolš pierakanaŭčymi i pryhavaryła Ivana Kulaša da rasstrełu.
Heta druhi śmiarotny pryhavor u 2015 hodzie: 18 sakavika Homielski abłasny sud prysudziŭ žychara Rečycy Siarhieja Ivanova da vyšejšaj miery pakarańnia, małady čałaviek pryznany vinavatym u žorstkim zabojstvie dziaŭčyny. Viarchoŭny sud pakinuŭ pryhavor u sile.
Biełaruś — adzinaja kraina ŭ Jeŭropie i na postsavieckaj prastory, dzie dahetul prymianiajecca śmiarotnaja kara. Z pačatku 1990 hoda da vyšejšaj miery było pryhavorana bolš za 400 asudžanych.
