«Z 9 pa 20 listapada 2015 h. u Respublicy Biełaruś pracavała misija Mižnarodnaha valutnaha fondu (pad kiraŭnictvam Pitera Dołmana), nadzielenaja paŭnamoctvami na abmierkavańnie z Respublikaj Biełaruś mahčymaści zaklučeńnia novaj prahramy pašyranaha finansavańnia, nacelenaj na kompleksnaje ŭdaskanaleńnie ekanomiki Respubliki Biełaruś», — havorycca ŭ paviedamleńni Nacbanka.
«Padčas praviedzienych pierahavoraŭ bakam udałosia istotna zblizić svaje pazicyi. Uličvajučy, što sumiesnyja miery, jakija raspracoŭvajucca, nakiravanyja na pavyšeńnie kankurentazdolnaści i zabieśpiačeńnie ŭstojlivaha raźvićcia biełaruskaj ekanomiki, pavinny nasić kompleksny i ŭsioabdymny charaktar, ich detalovaje abmierkavańnie z ekśpiertami MVF budzie pradoŭžana na praciahu najbližejšaha času», — adznačajecca ŭ pres-relizie Nacbanka.
U chodzie ciapierašniaha vizitu Piter Dołman pravioŭ šerah sustreč z klučavymi ministerstvami, premjer-ministram Andrejem Kabiakovym i Alaksandram Łukašenkam. Kiraŭnik Biełarusi adznačyŭ, što jon znajomy z prapanovami MVF pa pierśpiektyvach adnosin ź Biełaruśsiu i pa asnoŭnych momantach budučaj prahramy.
«Pavinien skazać, što ŭ mianie nivodny punkt, jaki prapanujecca, nie vyklikaje nijakaha adarvańnia, nijakaj alerhii», — padkreśliŭ tady kiraŭnik dziaržavy.
Pavodle jaho słoŭ, prapanovy fondu zasnavanyja na absalutna abjektyŭnych zakonach ekanomiki. «Formuła adna: atrymlivaješ pasłuhu — płaci za hetuju pasłuhu ŭ poŭnym abjomie. Niachaj heta budzie elektryčnaść, ciapło, transpartnaje absłuhoŭvańnie i hetak dalej», — skazaŭ kiraŭnik dziaržavy. Alaksandr Łukašenka adznačyŭ, što «pytańnie tolki ŭ adnym — u terminach».
«Nie dumaju, što ŭ nas budzie vielmi vialikaja raźbiežka ŭ razumieńni hetych terminaŭ i ŭ terminach naohuł, — vykazaŭ upeŭnienaść jon. — My taksama naceleny na toje, kab prapanovy, jakija my vypracavali razam z vami, realizavalisia ŭ limitava karotkija terminy».
Ministr ekanomiki Uładzimir Zinoŭski ŭ čaćvier adznačyŭ, što Biełaruś i MVF užo praktyčna vyjšli na pryniaćcie prahramy. «My praktyčna vychodzim na prahramu, kali za hetuju noč ničoha nie źmianiłasia, tamu što pieramovy iduć u intensiŭnym režymie praktyčna pa 16 hadzin u sutki», - skazaŭ ministr. Dla realizacyi kredytnaj prahramy viasnoj hetaha hoda baki padrychtavali darožnuju kartu pa strukturnym refarmavańni ekanomiki. Adnak ministr nie staŭ kazać pra źmiest novaj prahramy z MVF, zajaviŭšy, što jana jašče ŭdakładniajecca i jaje kančatkovy varyjant budzie apublikavany paźniej.
Adkazvajučy na pytańnie z nahody sumy, jon paviedamiŭ: «Heta prykładna da $ 3 młrd na try hady».
