Z ukaranieńniem infarmatyzacyi ŭ achovu zdaroŭja Biełarusi ŭ krainie raźvivajecca adzinaja sistema telemiedycyny, jakaja skiravanaja na abmien infarmacyjaj pamiž daktarami.
Pra heta paviedamiŭ 20 listapada na pres-kanfierencyi zahadčyk adździaleńnia arhanizacyjna-mietadyčnaha supravadžeńnia infarmatyzacyi achovy zdaroŭja Respublikanskaha navukova-praktyčnaha centra miedycynskich technałohij, infarmatyzacyi, kiravańnia i ekanomiki achovy zdaroŭja Siamion Palakoŭ.
Pavodle słoŭ śpiecyjalista, ciapier hetaja sistema abnaŭlajecca i ŭ novym farmacie budzie ŭjaŭlać saboju sietku, jakaja abjadnaje ŭsiu miedycynskuju infarmacyju pra pacyjentaŭ i budzie pieradavacca praź śpiecyjalizavanyja centralnyja sierviery. Daktary mohuć dadavać u hetuju sistemu lubuju infarmacyju pra svaich pacyjentaŭ: historyju chvaroby, ambułatornyja karty, dyjahnastyčnyja daśledavańni i h.d. i pieradavać jaje kaleham u miežach miedycynskich kansultacyj.
«U cełym heta technałohija adpracavanaja, — skazaŭ Palakoŭ. — I kali raniej jana była ŭkarenienaja hałoŭnym čynam u šerahu rajonaŭ Homielskaj i Bresckaj abłaściej, najbolej paciarpiełych ad avaryi na Čarnobylskaj AES, to abnoŭlenaja sistema achopić usie respublikanskija centry i prykładna 70% abłasnych, jakija zajmajucca asnoŭnymi sacyjalna značnymi zachvorvańniami: endakrynałahičnymi, ankałahičnymi, tubierkuloznymi. Taksama ŭ sistemu budzie ŭklučana da 50% rajonnych arhanizacyj».
Jon adznačyŭ, što pakul havorka idzie pra tyja miedustanovy, jakija ŭžo centralizavana infarmatyzavanyja i asnaščanyja nieabchodnaj kampjutarnaj technikaj. U dalejšym da sistemy moža dałučycca lubaja arhanizacyja achovy zdaroŭja.
«Paśla zaćviardžeńnia sistemy ŭ Ministerstvie achovy zdaroŭja jana budzie pracavać pa prostym pryncypie: vam treba prakansultavacca — vy źbirajecie błok infarmacyi, adpraŭlajecie jaho na siervier na adras patrebnaj vam arhanizacyi, — skazaŭ Palakoŭ. — Ijerarchija takaja: kali heta rajon, to jon zapytvaje kansultacyju ŭ abłasnoj arhanizacyi, kali vobłaść — u respublikanskaj. Kali ž vobłaść sama nie moža vyrašyć pytańnie, to pieranakiroŭvaje jaho dalej, u respublikanski centr. Dalej daktary atrymlivajuć apaviaščeńnie, vyvučajuć infarmacyju i, kali mohuć, dajuć svajo kansultatyŭnaje zaklučeńnie; kali nie, mohuć zapatrabavać dadatkovuju infarmacyju ci damovicca pra sieans videakansultacyi».
U častcy biaśpieki infarmacyja budzie abaronienaja, i pieradača jaje budzie iści pa śpiecyjalnych kanałach u zašyfravanym vyhladzie.
Naprykancy Palakoŭ dadaŭ, što ŭ Minsku daŭno ŭžo pracuje prajekt, jaki možna adnieści da telemiedycyny, heta kansultavańnie fluarahrafičnych zdymkaŭ. Ciapier da jaho dałučyłasia kansultavańnie pa mamahrafii. «Nakolki ja viedaju, anałahaŭ hetamu prajektu ŭ SND niama», — skazaŭ jon.
