Śpiecsłužby Vialikabrytanii i Francyi buduć vieści abmien infarmacyjaj dla baraćby z terarystyčnaj pahrozaj. Ab hetym siońnia ŭ Paryžy zajaviŭ premjer-ministr Złučanaha Karaleŭstva Devid Kemieran paśla pierahavoraŭ z prezidentam Francyi Fransua Alandam.
«My damovilisia pavysić uzajemadziejańnie pa pytańni abmienu infarmacyjaj z Francyjaj i našymi jeŭrapiejskimi partniorami», - skazaŭ Devid Kemieran.
Taksama stała viadoma, što Francyja maje namier naroščvać pavietranyja ŭdary pa hrupoŭcy «Isłamskaja dziaržava» (ID) u Siryi. Ab hetym paviedamiŭ siońnia prezident Fransua Aland pa vynikach pierahavoraŭ z Devidam Kemieranam.
Jon nahadaŭ, što da bierahoŭ Siryi prybyŭ francuzski avijanosiec «Šarl de Hol». Na borcie avijanosca znachodzicca 18 samalotaŭ «Rafal» i 8 samalotaŭ «Supier-etandar», inšaja bajavaja i raźviedvalnaja avijacyjnaja technika. Raniej u rehijonie dziejničali 12 samalotaŭ francuzskich VPS (6 «Miraž-2000» i 6 «Rafal»), dysłacyravanyja na bazie ŭ Abjadnanych Arabskich Emiratach. «Meta mižnarodnaj supolnaści — źniščeńnie ID», — zajaviŭ francuski lidar.
U svaju čarhu kiraŭnik brytanskaha ŭrada Devid Kemieran zajaviŭ, što Vialikabrytanija pavinna dałučycca da pavietranych udaraŭ pa «Isłamskaj dziaržavie». Brytanski premjer zapeŭniŭ, što aficyjny Łondan padtrymlivaje namahańni Paryža ŭ baraćbie suprać isłamistaŭ i ŭdary Francyi pa pazicyjach ID u Siryi. «Ja pierakanany, što Vialikabrytanija pavinna zrabić toje ž samaje», — zajaviŭ Devid Kemieran. Jon paviedamiŭ, što ŭ siaredzinie tydnia pradstavić płan dziejańniaŭ na Blizkim Uschodzie ŭ parłamiencie Vialikabrytanii.
Devid Kemieran dadaŭ, što Vialikabrytanija pradastaviła ŭ rasparadžeńnie Francyi svaju vajennuju bazu na Kipry dla baraćby z terarystami ID.
