Acenačny košt pasyłak z tavarami z-za miažy, jakija zakazvajucca praź internet-mahaziny, naŭmysna zanižajecca. Ab hetym zajaviŭ siońnia staršynia Savieta Respubliki Michaił Miaśnikovič na pasiadžeńni manitorynhavaj hrupy pa razhladzie prajektaŭ ukazaŭ prezidenta Biełarusi i zakonaŭ u Saviecie Respubliki.
BiełTA
Staršynia Savieta Respubliki adznačyŭ, što za pieršaje paŭhodździe 2015 hoda žychary Biełarusi atrymali 4 młn 400 tys. pasyłak z tavarami z-za miažy. «Jany aceńvajucca ŭ $5, $10… Chacia na samaj spravie faktyčny košt zusim inšy, tamu biudžet niedaatrymlivaje PDV, pošliny», — skazaŭ jon. Pry hetym padkreśliŭ: «Ja nie suprać taho, kab kuplali heta, ale idzie prosta padłoh faktyčnaha koštu. Što daje mahčymaść adychodzić ad mytnych pošlin, płaciažoŭ i hetak dalej».
Raniej Michaił Miaśnikovič prapanoŭvaŭ uvieści PDV na takija pasyłki z tavarami, ale z hetym nie zhadziŭsia Nacbank, spasyłajučysia na toje, što prahramnaje zabieśpiačeńnie nie dazvalaje zrabić hetaha.
«Ja liču, što heta niapravilny padychod. Budu na hetym nastojvać. Kali my prachodzim u mahazin, na kasie prabivajuć PDV, i prahramnaje zabieśpiačeńnie spracoŭvaje. Kožny pakupnik vypłačvaje padatak. U nas jość rehistracyja na kožnuju pasyłku. Pry jaje ŭručeńni całkam možna heta pytańnie vyrašyć», — dadaŭ Michaił Miaśnikovič.
Staršynia Savieta Respubliki taksama ličyć, što takija pasyłki abvalili biełaruski handal i stvaryli prablemy dla pramysłovaści. «I, viadoma, heta vialikija straty dla biudžetu», — padkreśliŭ jon. Pavodle jaho źviestak, JEEK užo abmiarkoŭvaje pytańnie ŭviadzieńnia padatku na taki internet-handal. Razmova idzie ab prahresiŭnaj škale padatku na pasyłki z tavarami ź internet-mahazinaŭ, jakija pastupajuć u JEAES zvonku.
