Rasija zajaviła vajennamu ataše Turcyi aficyjny pratest u suviazi z atakaj tureckich źniščalnikaŭ na rasijski bambavik Su-24, paviedamlajuć infarmahienctvy sa spasyłkaj na pres-słužbu Minabarony RF.
«U Ministerstva abarony RF byŭ terminova vyklikany ataše pa pytańniach abarony pry pasolstvie Tureckaj Respubliki ŭ Rasii, jakomu byŭ zajaŭleny aficyjny pratest adnosna dziejańniaŭ VPS Turcyi», — skazali ŭ viedamstvie.
«U ciapierašni čas Minabarony Rasii raspracoŭvaje kompleks mierapryjemstvaŭ pa reahavańni na padobnyja incydenty», — skazali ŭ ministerstvie i dadali, što bajavyja dziejańni suprać terarystaŭ u Siryi buduć praciahnutyja.
Tym časam Turcyja źviarnułasia ŭ Radu Biaśpieki AAN u suviazi ź incydentam sa źbitym rasijskim vajennym samalotam. Pra heta, pa paviedamleńniach infarmahienctvaŭ, zajaviŭ brytanski dypłamat Mećju Rajkraft, staršynia ŭ RB u listapadzie. Pavodle jaho słoŭ, list, atrymany ad Ankary, «paviedamlaje pra sam fakt, ale nie zaklikaje da kankretnych dziejańniaŭ». Jak paviedamiŭ Rajkraft, na dadzieny momant ni adzin ź siabroŭ Rady Biaśpieki nie prasiŭ sklikać sustreču ŭ suviazi ź incydentam.
«My vielmi zaniepakojenyja incydentam sa źbitym rasijskim źniščalnikam», — skazaŭ Rajkraft, adznačyŭšy, što brytanski bok znachodzicca na suviazi z RF i Turcyjaj. «Važna, kab my vynieśli ŭroki adnosna nieabchodnaści skaračeńnia pahrozy kanfliktnaj situacyi. Ja zaklikaju ŭsie baki damahacca źnižeńnia napružanaści», — padkreśliŭ dypłamat. Jon adznačyŭ, što Łondan padtrymlivaje prava Turcyi abaraniać svaju pavietranuju prastoru.
U svaju čarhu pastajanny pradstaŭnik RF pry AAN Vital Čurkin adznačyŭ, što pakul nie viedaje, ci budzie Rasija sklikać Radu Biaśpieki. U sakrataryjacie AAN na dadzieny momant ustrymlivajucca ad kamientaroŭ z nahody incydentu.
