Uładalnik kultavaha matacykła z «Pahoniaj» padzialiŭsia sa Svabodaj, jak uźnikła i była realizavanaja ideja ŭpryhožyć «Charlej Devidsan» nacyjanalnaj symbolikaj.

Sioleta nadvorje padaryła bajkieram dosyć praciahły sezon, dazvoliŭšy napoŭnicu atrymać asałodu ad pajezdak.

Adnym z samych zaŭvažnych matacykłaŭ na mienskich darohach staŭ «Charlej Devidsan» z padkreślenaj nacyjanalnaj prynaležnaściu: u bieł-čyrvona-biełaj hamie, z «vyrazanymi» na bakach bienzabaku hierbami «Pahonia».

Haspadar madyfikavanaha «Charleja» — dyrektar hrupy reklamnych ahienctvaŭ, saŭładalnik kultavaj mienskaj «Halerei Ŭ» Alaksandar Vasilevič. Vykanaŭca zamovy — kamanda Juryja Šyfa, zasnavalnika kastamajzinhavaj majsterni Yuri Shif Custom.

Dvuchkołavy ekskluziŭ Alaksandra Vasileviča

Dvuchkołavy ekskluziŭ Alaksandra Vasileviča

Alaksandar raskazaŭ Svabodzie, što na hetym matacykle adjeździŭ amal dva sezony, ale vieršnik na borcie źjaviŭsia tolki sioleta — daviałosia nabracca ciarpieńnia. Ideju abiełarusić transpartny srodak tłumačyć «unutranym paklikańniem»:

«Vy ž bačycie, u jakich kolerach vytrymany matacykł. Tamu ideja naradziłasia dosyć prosta. Mahčyma, jana vymalavałasia adrazu ž, na miescy, užo ciažka navat zhadać. Ale peŭna, što ničoha štučna da idei nie pryciahvałasia, nie padhaniałasia. Sprava ŭ tym, što adpačatku Jura rabiŭ matacykł dla inšaha čałavieka, ale tam niešta «nia skleiłasia», padrabiaznaściaŭ nia viedaju. I kali ja pryjechaŭ, pahladzieŭ na jaho, jon mnie adrazu spadabaŭsia. Voś i ŭsio. Potym krychu dapracavali — i vyjšła toje, što siońnia bačym».

Alaksandar udakładniŭ, što pryjšoŭ da Juryja Šyfa nakont zusim inšaha varyjantu, ale toj pahladzieŭ i skazaŭ: «Ja viedaju, što tabie bolš pasuje». I pakazaŭ matacykł, jaki patencyjnamu pakupniku adrazu spadabaŭsia stylova. Surazmoŭca kaža, što «Pahonia» na jaho prasiłasia sama pa sabie, z čym pahadziŭsia i Jury. Adzinaje, daviałosia čakać ceły sezon, bo techničnaja realizacyja zadumy akazałasia davoli składanaj.

Alaksandar Vasilevič kala halerei «Ŭ»

Alaksandar Vasilevič kala halerei «Ŭ»

«Pahonia» na bieł-čyrvona-biełym «Charlei» — asobny techničny składnik. Pieradusim, jak kaža Alaksandar Vasilevič, havorka nie pra trafaret, jaki možna pieranieści na lubuju pavierchniu. Treba było sprajektavać varyjant, jaki b možna było vyrazać na aluminijevych nakładkach na benzabaku:

«»Pahoniu» nabivaŭ Jura, jaho majstry, ale, zrazumieła, z majoj padačy. Niaprostaja była zadača, bo treba było sprajektavać makiet, jaki b nia vyvaliŭsia z zadadzienaj ramki. Vidać, navat u takich specyjalistaŭ vyjšła nia ź pieršaha razu. Adpačatku na hetym miescy byli aluminijevyja nakładki, dyk chłopcy hety blok vyniali i potym užo vyrazali «Pahoniu». Tamu było davoli ciažka, bo sam pa sabie składany malunak vieršnika. Biezumoŭna, realizacyja ŭ takoj technicy patrabuje šmat vysiłkaŭ i vialikaha majsterstva».

Vieršnik atrymaŭsia «abjomny»

Vieršnik atrymaŭsia «abjomny»

Cikaŭlusia ŭ Alaksandra: jak reahujuć na taki vyhlad matacykła ŭdzielniki darožnaha ruchu? Surazmoŭca zapeŭnivaje, što prablemaŭ z boku Dziaržaŭtainspekcyi niama — prynamsi pakul; techničny ahlad projdzieny paśpiachova. A kiroŭcy dy piešachody, bieź pierabolšańnia, u zachapleńni:

«Pakul — tak, varyjant sapraŭdy adziny, ale spadziajusia, što ź ciaham času takoha transpartu na našych darohach budzie bolš. Što da reakcyi, to nijakich nehatyŭnych vodhukaŭ nia čuŭ, usim padabajecca. Admoŭnaha staŭleńnia nie zaŭvažyŭ, usie na pazytyvie. Vy ž sami bačycie, što heta prosta pryhoža. Nalapicie siudy niešta inšaje ź ciapierašnich symbalaŭ i zacanicie, ci budzie hetak ža estetyčna. Na žal, usia pryhažość sydzie».

Haspadar i technika: nacyjanalna śviadomyja

Na charlejeŭskim bienzabaku staić adsyłka da majsterni Yuri Shif Custom, jakaja i azdobiła matacykł zhodna z pažadańniami haspadara — kab nadać jamu vyrazny litvinski charaktar. Sam Jury Šyf kaža, što pastaviŭsia da zamovy z usioj paŭnatoj adkaznaści:

Znak jakaści: Yuri Shif Custom

Znak jakaści: Yuri Shif Custom

«»Pahonia»? A čamu nie? Vielmi dobra, jana ž va ŭsich sensach pryhožaja, da «Pahoni» my taksama padychodzim tvorča. Chaču nahadać, što ŭ nas nacyjanalnuju ideju nichto nie admianiaŭ, biełaruskija historyi ŭ nas byli, jość i buduć. I heta tyčycca nia tolki zakazčykaŭ, a i matacykłaŭ, kastamajzinhu. Prykładam, zrabili «kastam» matacykła mienskaha motaviełazavodu, ciapier heta pradukt usiaśvietnaha ŭzroŭniu z hledzišča kastamajzinhu. My jaho vyvozim na vystavy, jon usiudy drukavaŭsia, prosta zorka. A kali ŭžo havaryć pra rečy aktualizavanyja, to treba prosta navučycca lubić i pavažać siabie, svaje karani. Toje, što na hety momant jość realnaj prablemaj, što prosta vypalena ŭ našaj śviadomaści. Niama samapavahi — ad kankretnaj asoby da ŭsioj nacyi. Bo na adsutnaści ci najaŭnaści hetych bazavych pryncypaŭ hruntujecca pavaha da krainy».

Čym patłumačyć usplosk cikavaści z boku aktyŭnaj častki hramadztva da histaryčnaj, kulturnaj spadčyny ciapierašniaj Biełarusi? Alaksandar Vasilevič ličyć, što heta zakanamierny praces, zapačatkavany jašče ŭ siaredzinie 2000-ch:

«Heta lahičny praciah usiaho taho, što adbyvajecca ŭ krainie. I heta narmalna. Nijaki nie supraciŭ, a prosta cikavaść da svajoj kultury, da movy, da bazavych rečaŭ luboha hramadztva. Kali raniej jano ŭsprymałasia zbolšaha jak kulturna-viaskovy fenomen, to ciapier stanovicca kultavym, modnym, papularnym. Voś my staim pobač ź biełaruskamoŭnym baram, dzie zaŭsiody šmatludna. Tut ža Halereja sučasnaha mastactva — zaŭvažcie, nie salon pa prodažy pejzažaŭ dy naturmortaŭ. U kompleksie ź inšymi prajavami nacyjanalnaj admietnaści heta dadaje novy sens našamu času. Tema, ščyra kažučy, asobnaja, tamu što kaliści, u siaredzinie nulavych, my adnymi ź pieršych pačynali rabić reklamu na biełaruskaj movie. Byŭ dosyć praciahły praces, i ciapier my nazirajem kali nie viaršyniu, to značnuju častku hetaha pracesu. Hałoŭnaje, kab usio ŭrešcie nie zavaliłasia, kab nie pieratvaryłasia ŭ maskultavy treš».

2015 hod adznačany padvyšanym intaresam da nacyjanalnaj symboliki. U roznych varyjantach pradukujucca cišotki, kašuli, švedry z varyjacyjami tradycyjnaha biełaruskaha arnamentu. Śledam źjavilisia ŭpryhožańni dla aŭtatranspartu — «pałosy-vyšyvanki» na kapot dy astatnija elementy kuzava.

Alaksandar Vasilevič i jahony śviadomy «Charlej»

Alaksandar Vasilevič i jahony śviadomy «Charlej»

Asobnyja entuzijasty razharnulisia napoŭnicu: u vieraśni Svaboda pisała pra bieł-čyrvona-bieły «MINI Countryman» z hierbam «Pahonia» na dachu. Tutejšuju admietnaść brytanskaj mašynie «pryščapiŭ» Illa Procharaŭ — błohier, supracoŭnik aŭtamabilnaha chołdynhu «Atłant-M».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?