Fiederalnaja mytnaja słužba Rasii vyznačyłasia z pamieram novych pošlin na pasyłki z-za miažy, paviedamiła namieśnik kiraŭnika viedamstva Taćciana Halandziejeva. Za adpraŭleńni koštam ad 22 da 150 jeŭra viedamstva prapanuje spahaniać 10-15 jeŭra. Za bolš darahija pasyłki — takuju ž sumu plus 30% ad koštu pakupki. Tavary koštam da 22 jeŭra pošlinami abkładacca nie buduć.
Pa anałahičnaj šmatstupiennaj sistemie zboraŭ pracujuć krainy Jeŭrasajuza. Maskva prapanuje ŭvieści takuju ž sistemu ŭ Jeŭrazijskim ekanamičnym sajuzie (JEAES), kudy akramia RF uvachodziać Armienija, Biełaruś, Kazachstan, Kyrhyzstan.
Varyjant abaviazkovaha zboru pa inicyjatyvie rasijskaha boku pavinien byŭ abmiarkoŭvacca na hetym tydni na pasiadžeńni Jeŭrazijskaj ekanamičnaj kamisii, ale byŭ źniaty. Piarečyć suprać uviadzieńnia adzinaha pamieru zboru Kazachstan.
Ułady krainy spasyłajucca na damovu ab JEAES, pavodle jakoj uskosnyja padatki pry imparcie tavaraŭ fizičnymi asobami nie spahaniajucca. Akramia taho, Biełaruś vystupaje suprać vyzvaleńnia asobnych katehoryj tavaraŭ ad mytnych płaciažoŭ.
«Kali my uvapromsia ŭ ścianu i nie znojdziem kampramisu, mahčyma, Rasija ŭviadzie svoj zbor na nacyjanalnym uzroŭni, što nie chaciełasia b», — zajaviła Halandziejeva. Jana nahadała, što takim pravam siońnia ŭžo karystajecca, u pryvatnaści, Biełaruś, dzie ŭstalavanyja normy biaspošlinnaha ŭvozu tavaraŭ fizičnymi asobami ŭ paštovych adpraŭleńniach nižej za ahulnyja limity pa JEAES.
Adnak pryniaćcie rašeńnia «na piaciarych» usio ž taki lepiej z punktu hledžańnia taho, kab nie było «pieraciakańnia» internet-zakazaŭ u sumiežnyja dziaržavy z bolš vysokim paroham biaspošlinnaj dastaŭki, zaznačyła jana.
Sprečnaje pytańnie na pasiadžeńni Savieta JEAES na ŭzroŭni vice-premjeraŭ piaci krain płanujecca znoŭ abmierkavać na nastupnym tydni, 2 śniežnia. Ad Rasii na naradzie čakajuć pieršaha vice-premjera Ihara Šuvałava.
Ciapier u Rasii nie abkładajucca pošlinami pasyłki koštam da 1000 jeŭra i vahoj da 21 kh za adzin kalandarny miesiac. Pry pieravyšeńni limitu pošlina składaje 30%, ale nie mienš za čatyry jeŭra za 1 kh (spahaniajecca z sumy pieravyšeńnia paroha).
