Dvoje vajennasłužačych unutranych vojskaŭ MUS Rasii, zatrymanyja ŭ čacvier na terytoryi Łuhanskaj vobłaści Ukrainy, pieradadzienyja rasiejskim pamiežnikam. Pa słovach kiraŭnika pres-słužby ŭnutranych vojskaŭ MUS Rasii Vasila Pančankava, vajennyja zabłukali.
Pra zatrymańnie pablizu punkta propusku «Miełavoje» dvuch hramadzian Rasii ŭ vajennaj formie z apaznavalnymi znakami rasijskich unutranych vojskaŭ raniej paviedamiŭ pradstaŭnik Dziaržpahransłužby Ukrainy Aleh Słabadzian. U jaho zajavie havorycca, što rasiejcaŭ zatrymali «za niezakonnaje pierasiačeńnie dziaržaŭnaj miažy».
Jak tłumačyć Vasil Pančankaŭ, u čacvier hrupa vajennasłužačych unutranych vojskaŭ jechała na ciahniku Maskva-Hrozny na zbory ŭ navučalny centr u Krasnadarskim krai. Na stancyi Čartkova, jakaja raźmiaščajecca na miažy Rasii i Ukrainy, dvoje vajskoŭcaŭ vyjšli z vahona i, «nie ŭbačyŭšy nijakich vidavočna prykmietnych pahraničnych znakaŭ, paviarnuli ŭ bok ukrainskaj čyhunačnaj stancyi i apynulisia na terytoryi Ukrainy».
Pančankaŭ kaža, što miaža ŭ tym miescy prachodzić pa čyhuncy, a dźvie stancyi — rasijskaja i ŭkrainskaja — raźmiaščajucca nasuprać. «Tamu vajskoŭcy apynulisia pa toj bok miažy nienaŭmysna, biez złoha namieru i biez zbroi, navat nie viedajučy, što apynulisia za miažoj, prosta vyjšaŭšy z vahona», — raspavioŭ Pančankaŭ.
Rasijskich vajskoŭcaŭ spynili amal adrazu ž la pierona dla pravierki dakumientaŭ.
«Nad imi va Ukrainie ŭžo adbyŭsia sud, jany atrymali sudovuju pastanovu ab administracyjnym pravaparušeńni ŭ suviazi ź pierachodam miažy, u ciapierašni čas jany pieradadzienyja rasiejskim pamiežnikam», — cytuje Pančankava TASS.
