Śledčy kamitet Rasii zavočna pradjaviŭ biźniesmienu Michaiłu Chadarkoŭskamu abvinavačvańnie ŭ zabojstvie mera Niefciejuhanska Uładzimira Pietuchova, jakoje adbyłosia ŭ 1998 hodzie.
Pa słovach aficyjnaha pradstaŭnika viedamstva Uładzimira Markina, taksama Chadarkoŭskaha abvinavačvajuć u zamachu na zabojstva Viačasłava Kakoškina, jaki supravadžaŭ Pietuchova, i ŭ dvuch zamachach na biznesmena Jaŭhiena Rybina, padčas adnaho ź jakich zahinuŭ jaho achoŭnik.
«Pa dadzienych śledstva, mienavita Chadarkoŭski, źjaŭlajučysia akcyjanieram i staršynioj praŭleńnia naftavaj kampanii JUKAS, daručyŭ padnačalenym jamu supracoŭnikam kampanii Nieŭźlinu i Pičuhinu, a taksama inšym asobam zabojstva Pietuchova i Rybina», — śćviardžaje Markin.
Raniej sam Chadarkoŭski paviedamiŭ, što śledstva vyklikała jaho na dopyt u jakaści abvinavačanaha. Jon zajaviŭ, što nie pajedzie na dopyt, a taksama nazvaŭ svoj kryminalny pieraśled sprobaj adciahnuć uvahu hramadstva ad karupcyi ŭ vyšejšych ešałonach rasiejskaj ułady.
«Vystaŭlać mnie novyja abvinavačvańni pad Novy hod — daŭniaja tradycyja. Infarmacyi pra spravu bolš čym dastatkova. Zabojstva było raskryta ŭ tym ža hodzie, što i ździejśniena, u 1998-m. Byli znojdzienyja i aryštavanyja vykanaŭcy, zatym pa niezrazumiełych pryčynach adpuščanyja», — skazaŭ Chadarkoŭski.
Paźniej ludzi, jakich śledstva paličyła vykanaŭcami zabojstva, sami byli zabityja.
Michaił Chadarkoŭski byŭ dvojčy pryznany rasijskim sudom vinavatym u ekanamičnych złačynstvach i pravioŭ u miescach pazbaŭleńnia voli dziesiać hadoŭ. Jon admaŭlaje svaju vinu i nazyvaje svoj kryminalny pieraśled palityčna matyvavanym.
U 2013 hodzie Chadarkoŭskaha pamiłavaŭ prezident Rasii Uładzimir Pucin. Biznesmen źjechaŭ spačatku ŭ Niamieččynu, a potym u Šviejcaryju. Ciapier jon žyvie ŭ Łondanie. Eks-kiraŭnik JUKASa praciahvaje krytyčna vykazvacca ab stanoviščy spraŭ u Rasii i palitycy Pucina.
