U Biełarusi najmalniki prapanujuć šeść vakansij z zarpłataj zvyš Br40 młn u miesiac, paviedamili va ŭpraŭleńni palityki zaniataści Ministerstva pracy i sacyjalnaj abarony.
Samy vysoki ŭzrovień apłaty pracy dla suiskalnika (Br50 młn) — u adnym z TAA Minska, patrabujecca daśviedčany mieniedžar pa budaŭnictvie, jaki svabodna vałodaje anhlijskaj movaj. Jość mahčymaść pracaŭładkavacca na zarpłatu krychu mienšuju za Br50 młn u minskaje TAA — šukajuć kiraŭnika prajekta ź viedańniem jeŭrapiejskich standartaŭ budaŭnictva, u moŭnym arsienale jakoha - anhlijskaja, niamieckaja, łatyšskaja. Daśviedčany inžynier-prahramist moža pretendavać na rabočaje miesca z zarpłataj Br47 młn u adnoj sa staličnych kampanij. Anhłamoŭny dyrektar patrabujecca zamiežnamu pradpryjemstvu ŭ Minsku — hatovy prapanavać Br46,2 młn u miesiac. Dźvie kampanii Kitajska-biełaruskaha industryjalnaha parka «Vialiki kamień» (Smalavicki rajon Minskaj vobłaści) šukajuć kvalifikavanyja kadry na vakansii z zarpłataj Br40 młn — patrebny dyrektar z dośviedam raboty na kirujučych pasadach i viedańniem kitajskaj movy, a taksama načalnik adździeła ź viedańniem kitajskaj i anhlijskaj moŭ.
Ahulnarespublikanski bank vakansij na sajcie Minpracy i sacabarony štodzionna abnaŭlajecca. Pavodle dadzienych na 9 śniežnia biahučaha hoda, u im naličvałasia 27,8 tys. svabodnych rabočych miescaŭ, ź ich amal 8,2 tys. - u Minsku. U cełym pa Biełarusi bolš za pałavinu ŭsich vakansij pryznačany dla rabočych.
Zychodziačy sa źviestak najmalnikaŭ, u respublicy za hod udzielnaja vaha svabodnych rabočych miescaŭ z zarpłataj Br6001-8000 tys. pavialičyłasia z 4,4 pracenta da 5,3 pracenta, z zarpłataj Br8001-10000 tys. — z 1 pracenta da 1,6 pracenta. Bolš jak u dva razy pavialičyłasia dola vakansij z zarpłataj zvyš Br10 młn — z 0,5 pracenta da 1,1 pracenta. Pryčym u Minsku ich ciapier — 2,5 pracenta ad ahulnaj kolkaści svabodnych rabočych miescaŭ. Praktyčna kožnaja treciaja vakansija ŭ stalicy — z zarpłataj Br4001-6000 tys., kožnaja dziasiataja - Br6001-8000 tys., kožnaja tryccataja — Br8001-10000 tys.
Jość, zrazumieła, u banku vakansij i prapanovy rabočych miescaŭ z bolš nizkaj zarpłataj: 25,3 pracenta vakansij - Br3001-4000 tys., 22,8 pracenta — Br4001-6000 tys. Dla sumiaščalnikaŭ i tych, chto choča pracavać niapoŭny rabočy dzień,taksama jość niamała mahčymaściej padzarabić.
U cełym pa respublicy na adnu vakansiju ciapier umoŭna pretenduje 1,5 biespracoŭnaha. Pry hetym u Minsku - 1,2 vakansii na adnaho biespracoŭnaha.
Pavodle słoŭ śpiecyjalistaŭ, u zakon «Ab zaniataści nasielnictva Respubliki Biełaruś» płanujecca ŭnieści dapaŭnieńni i źmianieńni, nakiravanyja na pavyšeńnie efiektyŭnaści ŭklučeńnia ŭ ekanamičnuju dziejnaść niezaniatych hramadzian, stvareńnie ŭmoŭ dla raźvićcia i padtrymki vysokaj matyvacyi biespracoŭnych da aktyŭnaha pošuku raboty, uzmacnieńnie adkaznaści najmalnikaŭ i biespracoŭnych za vykanańnie zakanadaŭstva ab zaniataści. U pryvatnaści, prapanujecca źnizić z dvuch tydniaŭ da piaci dzion termin, jaki abaviazvaje najmalnikaŭ piśmova paviedamlać u orhany pa pracy, zaniataści i sacyjalnaj abaronie ab najaŭnaści ŭ ich vakansij.
