Mitrapalit Minska-Mahiloŭski, arcybiskup Tadevuš Kandrusievič i arcybiskup Kłaŭdya Hudžeroci
Arcybiskup słužyŭ u Biełarusi čatyry hady. Raniej Kłaŭdya Hudžeroci zajmaŭ pasadu Apostalskaha nuncyja ŭ Hruzii, Armienii i Azierbajdžanie. A naradziŭsia jon u italjanskaj Vieronie.
Ciapier Papa pryznačyŭ Hudžeroci Apostalskim nuncyjem va Ukrainie.
Pierad 12-j hadzinaj apoŭdni ŭ kaściole Najśviaciejšaj Panny Maryi ŭ Minsku pačali źbiracca vierniki. Raźvitacca z arcybiskupam pryjšli kala 200—300 čałaviek.
Piensijanierka Vieranika Hryškievič pryjechała z Maładziečna.
— Jon taki razumny, sapraŭdny słuha Božy, biez prytvorstva, kryvadušnaści… — kaža jana pra Hudžeroci, škadujučy, što Apostalski nuncyj źjazdžaje słužyć va Ukrainu.
— Naš biskup niezvyčajny, u nas takoha nie było, — raspaviadaje piensijanierka Viktoryja Kulpa ź Minskaha rajona. Jana adznačaje, što arcybiskup šmat zrabiŭ dla katalikoŭ u Biełarusi: pry im stała čatyry biskupy, pavialičyłasia kolkaść kaściołaŭ, jon aktyŭna pracavaŭ z moładździu, jeździŭ u pilihrymki.
Student BDU Valeryj Vinča, 21 hod, kaža, što Kłaŭdya Hudžeroci adkryty čałaviek, jakomu znajomaje pačućcio humaru.
— Časam nie čakaješ ad ksiandza takich žartaŭ. Jon žyćciaradasny, viasioły čałaviek, zaradžaje inšych enierhijaj, — pryznajecca Valeryj.
Na liturhiju taksama pryjšli biełaruskija biskupy, śviatary, kansekravanyja asoby katalickaj carkvy, pradstaŭniki pravasłaŭnaj i hreka-katalickaj cerkvaŭ.
Mitrapalit Minska-Mahiloŭski, arcybiskup Tadevuš Kandrusievič na pačatku liturhii nahadaŭ, što arcybiskupa Kłaŭdya Hudžeroci prybyŭ u Biełaruś čatyry hady tamu, i za hety čas biełaruski kaścioł mocna źmianiŭsia ŭ stanoŭčy bok.
Mitrapalit Minska-Mahiloŭski, arcybiskup Tadevuš Kandrusievič raźvitvajecca z arcybiskupam Kłaŭdya Hudžeroci.
Za čas słužeńnia ŭ nas arcybiskup ščyra cikaviŭsia žyćciom naroda, vučyŭ biełaruskuju movu, zachaplaŭsia sučasnaj biełaruskaj litaraturaj. Mitrapalit padkreśliŭ dypłamatyčnaść arcybiskupa, jakaja spatrebicca jamu ŭ słužeńni va Ukrainie ŭ nialohki dla susiedniaj krainy čas.
Raźvitalnaje kazańnie Kłaŭdya Hudžeroci pramaŭlaŭ na italjanskaj movie. Jaho pierakładali na biełaruskuju.
Arcybiskup pryznaŭsia, što jamu vielmi ciažka źjazdžać ź Biełarusi. Źviartajučysia da biełaruskich biskupaŭ i śviataroŭ, Hudžeroci skazaŭ, što adčuvaŭ ciapło sercaŭ, žadańnie biełarusaŭ zachavać śviet i słužyć Bohu ŭ miry.
Jon padzialiŭsia svaimi nazirańniami nakont taho, što biełaruski narod nie schilny da pratestu, nikoli nie spytaje śviatara, čamu toj nie padrychtavaŭsia da kazańnia. Jon prosta sydzie z kaścioła i bolš nikoli nie vierniecca.
Hudžeroci padziakavaŭ biełarusam, zaŭvažyŭšy, što naša historyja — šmatpakutnaja.
— Grazie babushkam, — skazaŭ jon dziakuj «babuškam», jakija niastomna naviedvajuć kaścioł.
Padčas vystupu arcybiskup pracytavaŭ Ryhora Baradulina i vierš «Dać vyraści…» sa zbornika «Ksty»:
«Nialohkaja praca,
Nialohkaadolnaja praca —
Strach u sabie źniabyć.
Boha nie treba bajacca —
Boha treba lubić».
Arcybiskup zaŭvažyŭ, što lepš zrazumieć biełarusaŭ i ich žyćcio jon zmoh dziakujučy našaj pryrodzie: lasam, palam, kvietkam i azioram.
Na raźvitańnie Kłaŭdya Hudžeroci padaryli kvietki, karcinu z vyjavaj abraza Maci Božaj Budsłaŭskaj i pled ź ilnu. Apošni padarunak uručali z pažadańniem, kab pad pledam arcybiskupu va Ukrainie śnilisia biełaruskija sny.
Arcybiskupu padaryli ilniany pled.
Kłaŭdya Hudžeroci pakinie Biełaruś užo praź niekalki dzion. Ale zaŭtra, 13 śniežnia, jon pajedzie ŭ Budsłaŭ, dzie budzie malicca ŭ kaściole Uniebaŭziaćcia Najśviaciejšaj Panny Maryi. Mienavita takuju pajezdku jon pierš za ŭsio zrabiŭ čatyry hady tamu, kali pryjechaŭ u Biełaruś.
Darahim padarunkam była karcina z vyjavaj abraza Maci Božaj Budsłaŭskaj.
Svaju pieršuju liturhiju va Ukrainie jon budzie słužyć u Lvovie ŭ ryma-katalickim chramie, potym pajedzie ŭ Kijeŭ i budzie malicca ŭ hreka-katalickaj carkvie.
