Na praciahu 8 hadoŭ dziejańnia zakona ab Karcie palaka hety dakumient atrymali ŭžo 140 tysiač čałaviek - u asnoŭnym, hramadzianie Ukrainy i Biełarusi.
Kala 140 tysiač čałaviek atrymali Kartu palaka - dakumient, jaki paćviardžaje prynaležnaść asoby (hramadzianina krainy SND ci Bałtyi) da polskaha naroda. Čaściej za ŭsio Karty palaka atrymlivajuć hramadzianie Ukrainy i Biełarusi. Zakon ab Karcie palaka byŭ uviedzieny 8 hadoŭ tamu.
16 śniežnia ŭ Siejmie Polščy padviali vyniki 8 hadoŭ funkcyjanavańnia zakona. Kiraŭnik parłamienckaj kamisii pa kantaktach z palakami za miažoj Michał Dvorčyk adznačyŭ, što ŭ zakon ab Karcie palaka buduć uviedzienyja źmieny.
«Havorka idzie pra toje, kab u ekstremalnych situacyjach, takich jak, naprykład, na Danbasie, ŭładalniki Karty palaka mahli mieć tyja ž pravy, što i hramadzianie Polščy. Druhoje źmianieńnie tyčycca taho, što kožny ŭładalnik Karty palaka zmoža paśla pryjezdu ŭ Polšču biaspłatna abmianiać jaje na vid na žycharstva», — raspavioŭ Michał Dvorčyk.
«Karta palaka — heta vielmi važny dakumient dla palakaŭ, jakija pražyvajuć u Biełarusi», - kaža Anžalika Borys, polski hramadski dziejač u Biełarusi.
«U Polščy hety dakumient daje šmat čaho - jon spraščaje kantakty, dazvalaje biaspłatna vučycca ŭ navučalnych ustanovach, pracavać bieź śpiecyjalnaha dazvołu. Biełaruskaja ŭłada napadała na zakon ab Karcie palaka, sprabavała abmiažoŭvać atrymańnie Kart palaka biełarusami», — kaža jana. Pry hetym Maryjuš Kavalski z Varšaŭskaha ŭniviersiteta padkreśliŭ, što raście kolkaść asob, jakija sprabujuć atrymać Kartu palaka, adnak, jakija nie majuć da Polščy nijakaha dačynieńnia.
«Varta zrabić bolš žorstkim kryteryi, pakolki mnohija ŭsprymajuć Kartu palaka jak «bilet sa źnižkaj» u Polšču», — adznačyŭ jon.