Ci patrebnyja Biełarusi ekanamičnyja reformy? Kali tak, to ci zdolnyja ažyćciavić ich tyja asoby, jakija kirujuć ciapier krainaj? Z takimi pytańniami karespandent Radyjo Svaboda źviartaŭsia da haradziencaŭ.
Mužčyna siaredniaha vieku: «Abaviazkova patrebnyja, bo zaraz užo niešta adbyvajecca takoje, što ekanomika hinie na vačach. U nas usio zaležyć ad taho, što adbyvajecca ŭ Rasiei. Nakolki ja razumieju, mahli b admysłoŭcy i z hetaha ŭradu niešta zrabić, ale ich prapanovy prypyniajucca na samym viersie. Jość maładyja admysłoŭcy, jakija majuć zadumki, ale heta ŭsio nia maje raźvićcia».
Mužčyna pensijnaha vieku: «Viadoma, patrebnyja. I nia prosta źmieny, a ŭžo revalucyja patrebnaja. Ale heta kiraŭnictva ničoha nia zdolnaje zrabić, ź ich takija refarmatary, jak ź mianie baleryna. Tut nia treba być ekanamistam, kab bačyć toje, što jany robiać ciapier. Heta jak zrabiŭ taburetku, sieŭ na jaje, a jana razvaliłasia — to jaki ty stalar?
Mužčyna pensijnaha vieku: «Abaviazkova patrebnyja reformy. Heta ž rost vytvorčaści, novyja pracoŭnyja miescy, raźvićcio ekanomiki, a inakš jana budzie stajać i atrymajecca zaniapad. I našaje kiraŭnictva zdolnaje ich ździejśnić, kali budzie vykonvacca ŭsio, što planujecca».
Mužčyna siaredniaha vieku: «Reformy patrebnyja, bo treba, kab u ekanomicy było bolš hrošaj. Ale naša kiraŭnictva hetaha nia zrobić, zasłaboje jano».
Małady chłopiec: «Mienavita dla Biełarusi nia vielmi patrebnyja ekanamičnyja reformy, bo narodu budzie składana. Ja liču, što hetaje kiraŭnictva zdolnaje ich zrabić. Na praciahu 20 hadoŭ jano pakazała siabie».
Mužčyna pensijnaha vieku: «Napeŭna, niešta možna było b źmianić, ale ŭ našaj sytuacyi i tak usie kruciacca, jak mohuć. Napeŭna, ludzi tam nie durnyja siadziać i, napeŭna, nie imknucca zrabić tak, kab nasielnictvu horš žyłosia».
Maładaja žančyna: «Nu, chaciełasia b, kab ceny ŭ kramie byli mienšyja, kab rost dalara spyniŭsia. Suadnosna treba niešta źmianiać. Dumaju, zdolnaje i ciapierašniaje kiraŭnictva niešta źmianić. My ž niejak žyviom, niahledziačy na toje, što dalar raście, atrymlivajem zarobki. A kali ŭziać inšyja krainy, to tam i hetaha niama».
