6 lutaha maci źnikłaha eks-ministra ŭnutranych spraŭ Biełarusi Juryja Zacharanki pavinšavali adnapartyjcy jaje syna.

U miastečka Vasilevičy Rečyckaha rajonu pryjechali z Homiela siabry Abjadnanaj hramadzianskaj partyi Ŭładzimier Kacora i Vasil Palakoŭ. Chacia na kalendary zimovy miesiac luty, nadvorje ŭ hety dzień było ciopłym, i haspadynia sama vyjšła z kijočkam da vieśničak sustrakać haściej. Hamielčuki ŭručyli Ullanie Ryhoraŭnie čyrvonyja ružy z pažadańniem doŭhich hadoŭ žyćcia i dobraha samaadčuvańnia.

Uładzimier Kacora zaznačyŭ, što, na žal, jany z kaleham nie pryvieźli Ullanie Zacharancy niejkich novych źviestak pra źnikłaha syna, ale vykazaŭ nadzieju, što jana budzie macavacca j dačakajecca taho času, kali stanie viadomaja ŭsia praŭda pra los i Juryja Zacharanki, i Viktara Hančara, i ŭsich inšych źnikłych ludziej.

«Raśśledavańnie spravy Juryja Zacharanki praciahvajecca tamu, što ŭ Biełarusi jość nieabyjakavyja ludzi, jakija nie zabyvajuć pra źnikłych, damahajucca, kab praŭda pra ich źniknieńnie była abnarodavana. Kab nie było takich ludziej, to ŭłady, peŭna, daŭno b zakryli hetuju spravu, pakolki minuła ŭžo zvyš piatnaccaci hadoŭ. Da źniknieńnia Juryja Zarachanki dy inšych palitykaŭ, ja ŭpeŭnieny, maje dačynieńnie viarchoŭnaja ŭłada. I pakul hetaja ŭłada zastajecca, to ludzi, jakija praŭdu viedajuć, jaje nia skažuć, i adpaviednyja dakumenty nia mohuć być raskryty», — kaža Uładzimier Kacora.

Ullana Ryhoraŭna i jaje plamieńnica Luba apaviali, što ledź nia kožnyja try miesiacy im prychodzić paviedamleńnie sa Śledčaha kamiteta ab tym, što raśśledavańnie źniknieńnia Juryja Zacharanki padoŭžana. Pajšoŭ siamnaccaty hod, a vynikaŭ pakul niama.

Maci źnikłaha hienerała ŭściešana ciapier tolki adnym: joj rehularna telefanujuć ź Niamieččyny ŭnučki, dočki Juryja, a taksama jaho žonka Volha. Jany źjechali ŭ Niamieččynu, bajučysia za svajo žyćcio. Unučka Alena telefanavała i siońnia — vinšavała i dasłała da dnia narodzinaŭ pasyłku z tamtejšymi cukierkami j kaŭbasami.

Dapamahła siamja syna Ullanie Ryhoraŭnie j finansami, kali treba było ramantavać dom. A srodki na padviadzieńnie pryrodnaha hazu ŭ dom dapamahała źbirać Abjadnanaja hramadzianskaja partyja.

Jak zaŭsiody, Ullana Zacharanka ź plamieńnicaj zaprasili haściej za śviatočny stoł. Jość u haspadyni i svaja firmovaja strava — blinčyki z tvarahom, ad jakich nikoli nichto nie admaŭlaŭsia. Jany byli na stale j siońnia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?