Technałahičny prahres upłyvaje na ŭsie śfiery žyćcia i źmianiaje ŭłaścivaści zvykłych rečaŭ. Apošnim časam navukoŭcy vykarystoŭvajuć termin «internet rečaŭ». Heta kancepcyja kampjutaryzavanaj sietki rečaŭ, jakija mohuć uzajemadziejničać adna z adnoj ci z navakolnym asiarodździem. Adnym z prykładaŭ Internet of Things źjaŭlajecca tak zvanaje «razumnaje adzieńnie».

«Razumnaje adzieńnie» — heta adzieńnie (ci aksesuar), jakoje moža ŭzajemadziejničać z navakolnym asiarodździem, usprymać vonkavyja sihnały i źmianiać svaje ŭłaścivaści pad upłyvam źniešnich faktaraŭ.

Samymi pieršymi «razumnaje adzieńnie» pačali raspracoŭvać navukoŭcy z vajskovaj haliny.

U 1996 hodzie ŭ Technałahičnym instytucie Džordžyi pačałasia raspracoŭka «razumnaj cialniaški». Hety prajekt ažyćciaŭlaŭsia pad patranažam VMS ZŠA. Paźniej pačali źjaŭlacca kamiercyjnyja prajekty, i da raspracoŭki byli dałučany pradstaŭniki industryi mody i vytvorcy kampjutarnych kampanientaŭ. U 2006 hodzie startap Sensatex pačaŭ kamiercyjnuju vytvorčaść «razumnych sakołak».

Spartyŭnaja industryja aktyŭna karystajecca «razumnym adzieńniem». Naprykład, Nacyjanalnaja futbolnaja liha ZŠA vykarystoŭvaje šałomy z aksieleromietram, što dazvalaje imhnienna atrymlivać infarmacyju, nakolki surjozny ŭdar atrymaŭ spartsmien, ci patrebnaja jamu miedyčnaja dapamoha i nakolki jon moža vybyć z hulni.

Jość i prykłady vykarystańnia «razumnaha adzieńnia» ŭ amatarskim sporcie. Nike i Apple sumiesna vypuścili krasoŭki sa śpiecyjalnym datčykam, jaki adsočvaje ruch karystalnika. Sinchranizavany IPod albo IPhone paviedamić pra čas, dystancyju, chutkaść i kolkaść zatračanych kałoryj. Možna vybrać Power-pieśniu, jakaja budzie ŭklučacca ŭ toj momant, kali Vy pačniacie stamlacca, a ruch — zapavolvacca.

Jašče adnym prykładam «razumnaha adzieńnia» źjaŭlajecca Polo Tech ad Ralfa Łorena.

Za 295 dalaraŭ možna nabyć sakołku z datčykami, jakija adsočvajuć asnoŭnyja žyćciovyja pakazčyki čałavieka (cisk, sardečny rytm, tempieraturu i inšyja). Usia hetaja infarmacyja moža ŭ režymie anłajn pakazvacca doktaru.

«Čornaja skrynia», na jakuju zachoŭvajecca ŭsia asnoŭnaja infarmacyja, moža pracavać bieśpierapynna 30 hadzin. Sakołka sinchranizujecca z pryładami Apple. Takim čynam, usie žyćciovyja pakazčyki dasyłajucca i zachoŭvajucca na IPhone albo IPad praz Bluetooth 4.0. Sakołku možna biez prablem myć, jana nie baicca vilhaci, chacia płavać u joj nie rekamiendujecca. Pakul što Polo Tech možna nabyć tolki ŭ ZŠA.

U apošni čas pry stvareńni «razumnaha adzieńnia» vykarystoŭvajecca «elektronnaja tkanina». «Elektronnaja tkanina» — heta tekstyl, častkaj jakoha źjaŭlajucca elektronnyja elemienty. Prykładam vykarystańnia technałohii «elektronnaj tkaniny» moža być žanočy pojas, zrobleny z optavałakonnaj tkaniny, jakaja śviecicca ŭ ciemry.

U šyrokim razumieńni «razumnym adzieńniem» (wearable technology) možna ličyć i partatyŭnyja pryłady, jakija možna pieranosić na ciele (naprykład, šałomy z ubudavanaj kamieraj albo «razumnyja hadzińniki» ad Samsung i Apple).

U katehoryju «wearable technology» traplajuć i akulary ad Google. Pryłada dazvalaje z dapamohaj hałasavoha kiravańnia rabić fota- i videazdymki i zapuskać dadatki Google. U studzieni 2015 hoda Google prypyniła prodaž Google Glass u suviazi z zaviaršeńniem vyprabavalnaha pieryjadu. Google zajaviła, što pradukt jašče źjavicca na rynku, ale im budzie zajmacca novaja kamanda. Na žal, pra kankretnyja terminy vychadu na rynak, charaktarystyki i košt novych akularaŭ u Google nie paviedamili. Ekśpierty miarkujuć, što akulary krychu apiaredzili svoj čas, i na dadzieny momant niekatoryja charaktarystyki nie mohuć być jakasna realizavany na padobnych pryładach.

Aktyŭna vykarystoŭvajecca «razumnaje adzieńnie» i ŭ miedycynie. Akramia asnoŭnych bijamietryčnych pakazčykaŭ, niekatoryja ŭzory takoha adzieńnia mohuć analizavać rabotu asobnych hrup ciahlic, znachodzić traŭmy na ciele, nazirać za ŭskładnieńniami dyjabietu, vyjaŭlać chvaroby małočnaj załozy.

Nie spyniajuć raspracoŭku «razumnaha adzieńnia» i vajskoŭcy. U miežach prajekta Future Force Warrior navukoŭcy raspracoŭvali bajavy kaścium dla piachoty. Hety kaścium pavinien całkam abaraniać čałavieka i dapamahać jamu ruchacca z dapamohaj ekzaškileta, na im ustalavana sistema manitorynhu stanu sałdata, jość šałom z dysplejem i sistemaj kamunikacyi. Ale armija ZŠA prahnazuje, što kančatkovy i całkam realizavany pradukt źjavicca tolki paśla 2032 hoda.

Na dadzieny momant «razumnaje adzieńnie» nie samaje zručnaje, maje davoli vysoki košt i abmiežavany nabor funkcyj. Ale z raźvićciom technałohij jano budzie karystacca vialikim popytam nie tolki siarod vajskoŭcaŭ i spartsmienaŭ, ale i siarod prostych ludziej.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?