U Dziaržaŭnaj fiskalnaj słužbie Ukrainy zajavili, što ŭ 2008 hodzie televiadučy, saŭładalnik kanała 3s.tv, hramadzianin Kanady Savik Šuster uziaŭ kredyt u €1,34 młn, jaki svoječasova nie viarnuŭ, a taksama nie ŭkazaŭ jaho ŭ svajoj dekłaracyi ab dachodach i ŭchiliŭsia ad vypłaty padatkaŭ na sumu bolš za 2,1 młn hrn.

DFS paviedamlaje, što śledčym upraŭleńniem finansavych rasśledavańniaŭ hałoŭnaha ŭpraŭleńnia viedamstva ŭ Kijevie rasśledujecca kryminalnaja sprava pa fakcie naŭmysnaha ŭchileńnia ad vypłaty padatkaŭ u dačynieńni da Šustera i ŭ dačynieńni da słužbovych asob TAA «Savik Šuster Studyja».

Tak, DFS nahadvaje, što, pa jaje dadzienych, słužbovyja asoby TAA «Savik Šuster Studyja» panizili padatak na dadanuju vartaść na ahulnuju sumu 1,99 młn hrn (u asnoŭnym, za košt panižeńnia koštu teleprahram «Šuster Live»), i pracedura administracyjnaha abskardžańnia padatkovych rašeńniaŭ-apaviaščeńniaŭ zavieršana na karyść padatkovaj inśpiekcyi.

Raniej było viadoma, što padatkovaja słužba paličyła padazronym, što «Savik Šuster Studyja» pradała Nacyjanalnaj telekampanii Ukrainy svaje prahramy pa canie, nižejšaj za rynkavuju (za 12 hryŭniaŭ), i abvinavaciła studyju va ŭchileńni ad vypłaty padatkaŭ, zapatrabavaŭšy kampiensacyi ŭ pamiery bolš za 13 młn hrn. Studyja sprabuje abskardzić hetaje rašeńnie.

Adnak, akramia hetaha, DFS vyśvietliła, što Šuster u 2008 hodzie atrymaŭ na svoj valutny rachunak pracentny finansavy kredyt u pamiery €1,34 młn i nie viarnuŭ jaho pazykadaŭcu ŭ damoŭleny termin. Pa dadzienych padatkavikoŭ, Šuster u parušeńnie zakona «Ab padatku z dachodaŭ fizičnych asob» nie padaŭ u padatkovuju inśpiekcyju dekłaracyju ab atrymanych dachodach i ŭchiliŭsia ad vypłaty padatku z dachodaŭ fizičnych asob na sumu bolš za 2,1 młn hrn, heta značyć u asabliva bujnym pamiery.

U ramkach rasśledavańnia płanujecca praviadzieńnie padatkovaj pravierki Šustera ab paŭnacie vypłaty padatkaŭ z sumy niaviernutaj pazyki.

«Fiskalnaja słužba trojčy vyklikała Šustera dla dačy pakazańniaŭ, što aznačaje, što jon viedaŭ ab najaŭnaści kryminalnaj vytvorčaści», — havorycca ŭ paviedamleńni.

26 krasavika stała viadoma, što Kijeŭski haradski centr zaniataści anulavaŭ dazvoł Šustera na pracu va Ukrainie na padstavie taho, što jon nie paviedamiŭ, što ŭ 2015 hodzie suprać jaho była adkrytaja kryminalnaja sprava.

Advakat Šustera Jaŭhien Piatrenka padkreśliŭ, što kryminalnaja sprava ab niavypłacie padatkaŭ, na jakuju spasyłajucca ŭ centry zaniataści, adkryta nie ŭ dačynieńni da Šustera asabista, a ŭ dačynieńni da «Savik Šuster Studyi», heta značyć kampanii.

Sam Šuster ličyć, što, pieraśledujučy «Savik Šuster Studyju», Dziaržaŭnaja fiskalnaja słužba «vykonvaje zamovu ludziej, jakim nie vyhadna, kab na telekanałach hučała praŭda», a jaje kiraŭnik Raman Nasiraŭ zvodzić asabistyja rachunki z televiadučym.

Клас
0
Панылы сорам
0
Ха-ха
0
Ого
0
Сумна
0
Абуральна
0