Apošnim časam vakoł BiełAES padniałasia palityčnaja vakchanalija, zajaviŭ 27 maja žurnalistam ministr zamiežnych spraŭ Uładzimir Makiej.

«Adnoj rukoj Litva hałasuje za admienu sankcyj, druhoj — suprać supracoŭnictva ź finansavymi instytutami, jakija sadziejničajuć budaŭnictvu AES. Biełarusi niezrazumiełyja palityčnyja insinuacyi vakoł budaŭnictva Biełaruskaj atamnaj stancyi, — skazaŭ ministr. — Heta aznačaje faktyčna novyja zavualavanyja sankcyi».

Pavodle jaho słoŭ, Biełaruś jak kraina, jakaja najbolš paciarpieła ad čarnobylskaj katastrofy, «nikoli nie budzie budavać niebiaśpiečnuju stancyju». «My nie chacieli b znoŭ mieć «atamnuju bombu zapavolenaha dziejańnia», jak vobrazna vykazaŭsia adzin ź litoŭskich palitykaŭ. My nie takija, prabačcie, idyjoty», — padkreśliŭ kiraŭnik źniešniepalityčnaha viedamstva.

Makiej źviarnuŭ uvahu, što adzin z paprokaŭ Litvy składajecca ŭ tym, što Biełaruś buduje niebiaśpiečnuju AES novaha typu. Pavodle jaho słoŭ, rasijski reaktar takoha typu vykarystoŭvajecca ŭ tym liku ŭ šerahu jeŭrapiejskich krain — Čechii, Słavienii, Vienhryi, Finlandyi. Litva taksama vystaŭlaje pretenziju, što AES budujecca ŭsiaho tolki za 50 kiłamietraŭ ad Vilniusa. Makiej pryvioŭ prykłady, kali ŭ šerahu krain Jeŭropy takija stancyi budujucca pablizu bujnych haradoŭ i miežaŭ susiednich krain, ale ich nichto za heta nie paprakaje.

«My nie paprakajem Litvu ŭ tym, što Ihnalinskaja AES usiaho za dva kiłamietry», — skazaŭ Makiej. Jon adznačyŭ, što Biełaruś nieadnarazova nakiroŭvała zapyty ab tym, jak mienavita jana vyvodziłasia z ekspłuatacyi, a taksama ab tym, jak viadziecca budaŭnictva atamnaj stancyi ŭ Visahinasie i schovišča adpracavanaha jadziernaha paliva niepadalok ad biełaruska-litoŭskaj miažy. Adnak adkazaŭ na hetyja zapyty tak i nie atrymała.

Pavodle słoŭ kiraŭnika MZS, biełaruski bok nieadnarazova prapanoŭvaŭ Litvie pravieści nieaficyjnyja kansultacyi pa AES. Jon paviedamiŭ, što ŭ treciaj dekadzie červienia Biełaruś i Litva praviaduć u Vilniusie aficyjnyja kansultacyi.

«Antybiełaruskaja isteryja, jakaja nahniatajecca ŭ litoŭskim hramadstvie, nie spryjaje raźvićciu dobrasusiedskich, siabroŭskich adnosin pamiž našymi krainami. My brackija narody i nam niama čaho dzialić. Treba adyści ad palityčnych zaklikaŭ i insinuacyj, sadzicca ekśpiertam za stoł pieramoŭ i abmiarkoŭvać usie pytańni, jakija turbujuć abodva baki», — ličyć ministr.

Nahadajem, 5 maja Ministerstva zamiežnych spraŭ Litvy ŭručyła pasłu Biełarusi Alaksandru Karalu notu z-za «mahčymaha incydentu na raźmieščanaj za 50 km ad Vilniusa Astravieckaj atamnaj elektrastancyi». Padstavaj stała infarmacyja, apublikavanaja na sajcie telekanała «Biełsat», ab tym, što ŭ siaredzinie krasavika zdaryłasia abrušeńnie stojek budynka jadziernaha absłuhoŭvańnia elektrastancyi, jaki budujecca.

Nastupnym dniom Ministerstva enierhietyki Biełarusi paviedamiła, što 8 krasavika byŭ zafiksavany defiekt pry padrychtoŭčych rabotach, nastupstvy jakoha likvidavanyja.

U toj ža dzień u Minenierha prajšła sustreča namieśnika ministra Uładzimira Zakreŭskaha z pasłom Litvy ŭ Biełarusi Evałdasam Ihnatavičusam, padčas jakoj dypłamata zaprasili naviedać placoŭku, dzie budujecca stancyja. Zatym pasoł byŭ pryniaty ŭ MZS Biełarusi, dzie jamu pieradali aficyjnuju infarmacyju ab adsutnaści jakich-niebudź incydentaŭ na budplacoŭcy. 10 maja stała viadoma, što dypłamat admoviŭsia ad zaprašeńnia naviedać budplacoŭku, spasłaŭšysia na toje, što biaśpieku stancyi «pavinny aceńvać ekśpierty».

Aficyjny Vilnius nieadnarazova padkreślivaŭ, što Litva nie maje namieru kuplać elektraenierhiju ź Biełaruskaj AES. Z punkta hledžańnia litoŭskaha boku, budaŭnictva stancyi parušaje patrabavańni Kanviencyi ab acency ŭździejańnia na navakolnaje asiarodździe ŭ transhraničnym kantekście (Kanviencyja Espaa), jakaja praduhledžvaje acenku ŭździejańnia abjektaŭ na navakolnaje asiarodździe nie tolki ŭnutry krainy, ale i ŭ sumiežnych.

Siejm Litvy zaklikaŭ pryniać miery dla spynieńnia budaŭnictva Biełaruskaj atamnaj stancyi. Adpaviednuju rezalucyju litoŭski parłamient pryniaŭ 12 maja «ŭ suviazi z mahčymaj niebiaśpiekaj dla Litvy Astravieckaj atamnaj elektrastancyi, jakaja budujecca za 50 km ad Vilniusa».

Biełaruskaja AES ŭzvodzicca ŭ Hrodzienskaj vobłaści, prykładna za 20 km ad Astraŭca, pavodle prajekta rasijskaj kampanii «Atamstrojekspart». Hienieralnym prajekciroŭščykam i padradčykam vystupaje rasijskaja kampanija AAT «NIAEP» — ZAT «ASE». Stancyja budzie składacca z dvuch enierhabłokaŭ sumarnaj mahutnaściu da 2.400 MVt. Uvod u ekspłuatacyju pieršaha błoka zapłanavany blizu 2018 hoda, druhoha — da lipienia 2020-ha.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?