Kala 15 ton kamianioŭ u minułuju subotu było vyvieziena z terytoryi Parku minijaciur zamkaŭ i chramaŭ Vialikaha Kniastva Litoŭskaha. Va ŭborcy parku ŭziali ŭdzieł kala 20 dobraachvotnikaŭ z roznych pratestanckich cerkvaŭ Minska, Hrodna, Bresta.

«Pry padrychtoŭcy terytoryi parku my sutyknulisia z surjoznaj prablemaj - vialikaja kolkaść kamianioŭ. Kab ich sabrać i vyvieźci našym pracoŭnym pryjšłosia b vydatkavać niekalki dzion, a vałanciory dapamahli nam usio zrabić litaralna za za 6 hadzin. Razam z vałanciorami my sabrali i zavieźli 9 hruzavikoŭ kamianioŭ», - raspaviadaje dyrektar fondu« Kraina zamkaŭ» Aleś Varykiš.

Pa słovach Varykiša, na adnoj z ekskursij, dzie było šmat moładzi, jon žartam zaprasiŭ junakoŭ u vałanciorski letnik, i jany adhuknulisia.

Dla vałancioraŭ byli arhanizavanyja charčavańnie i načleh. U znak padziaki fond «Kraina zamkaŭ» pravioŭ ekskursii pa navakolnych vydatnych miaścinach, u tym liku ŭ Halšanski i Kreŭski zamki.

Aleś Varykiš pierakanany, što ŭ nas u krainie šmat nieabyjakavych ludziej, hatovych dapamahčy ŭ prajektach, jakija rekłamujuć našu historyju, našy tradycyi. «Važna znajści takich ludziej, zamatyvavać, padtrymać, i možna ruchać hory», — padkreśliŭ kiraŭnik fondu «Kraina zamkaŭ».

Pakul heta pieršy vopyt pryciahnieńnia dobraachvotnikaŭ da stvareńnia Parku minijaciur. Pieršy, ale nie apošni. Dapamoha vałancioraŭ spatrebicca jašče pry prakładańni ściažynak i ŭstalavańni aharodžy vakoł parku.

Nahadajem, u pačatku hetaha hoda fond «Kraina zamkaŭ» abviaściŭ ab stvareńni Parku minijaciur zamkaŭ i chramaŭ Vialikaha Kniastva Litoŭskaha.

Hetaja ideja była padtrymanaja ŭ miežach adnaho z prajektaŭ ES/PRAAN. Pad park užo adviedzieny i spłanavany ziamielny ŭčastak za 5 km ad Halšan u byłoj šlachieckaj siadzibie Rodzievičy, stvoranyja i drukujucca na 3D-drukarcy pamienšanyja kopii zamkaŭ i chramaŭ.

Niadaŭna dla paskareńnia druku abjektaŭ dyrektar Aleś Varykiš abviaściŭ pra pačatak kampanii pa zbory srodkaŭ na nabyćcio dvuch dadatkovych 3D-drukarak. Zrabić svoj uniosak u stvareńnie parku možna na sajcie Tałaki.

Pa padrabiaznuju infarmacyju źviartajciesia:

(29) 6546484 Aleś Varykiš

(29) 8656324 Ihar Stankievič - PR-mieniedžer prajekta

Клас
0
Панылы сорам
0
Ха-ха
0
Ого
0
Сумна
0
Абуральна
0