Błukajučy pa videapartale YouTube, niaredka možna adšukać cikavyja videa, datyčnyja Biełarusi. Hetak, karystalnik Haradzeniec źmiaściŭ ceły film, pryśviečany barbarskaj "rekanstrukcyi" Harodni. Jak vyjaviłasia, jaho źniali chłopcy z haradzienskaj škoły №28. Zdymali prościeńkaj videakameraj, mantavali na ŭłasnych kamputarach – a atrymaŭsia cikavy prajekt. Maładziony navat arhanizavali prezentacyju filma ŭ rodnaj škole, ale, jak kažuć chłopcy, paśla hetaha svaimi pracoŭnymi miescami ledź nie papłacilisia zahadčyk haradskoha upraŭleńnia adukacyi S. Błažej, dyrektar škoły M. Achmietaŭ i nastaŭnik školnikaŭ, zahadčyk školnaha muzieja I. Rabkoŭ. Baćkoŭ školnikaŭ (a niekatoryja ź ich zajmajuć davoli značnyja pasady ŭ dziaržustanovach) papiaredzili pa słužbovaj linii. U samich školnikaŭ taksama pačalisia prablemy – im nie dajuć vystupać u školnych navukovych kanferencyjach u Harodni. Tamu aŭtary filmu prasili nie afišavać ich imionaŭ – akurat ciapier jany zdajuć ustupnyja ispyty.
U techničnym planie film niebiezdakorny – ale heta akurat i pryvablivaje hledača. Kadry “restaŭracyi” Harodni, źniatyja nibyta schavanaj kameraj u spałučeńni z pazakadravym kamentarom dy pahroźlivaj muzykaj vyhladajuć, jak kryminalnaja chronika. Film stvorany ź luboŭju dy na čystym entuzijaźmie – pabolej by takich prajektaŭ.
Pahlladzieć film možna tut. Dla taho, kab prahladać jaho nie ŭ internecie, a spampavać na kamputar, raim skarystacca prahrammaj YouTube Downloader, jakuju možna zadarma spampavać tut.
