Pa słovach Mirončyka, Biełaruś ličyć adnym z samych značnych dasiahnieńniaŭ Sajuznaj dziaržavy adsutnaść miežaŭ pamiž dźviuma krainami, piša TUT.BY.

«Heta realnaja svaboda pieramiaščeńnia dla hramadzian Biełarusi i Rasii, a taksama trecich krain. Ad hetaha jość vielizarnyja plusy ŭ čysta čałaviečym i ekanamičnym płanie, u tym liku za košt pryvabnaści tranzitu praz Rasiju i Biełaruś dla zamiežnikaŭ», — skazaŭ Mirončyk.

Mirončyk adznačyŭ, što dla hramadzian trecich krain heta zručnaść nie aznačaje bieskantrolnaść: jany znachodziacca praź mižnarodnyja punkty propusku i na padstavie sapraŭdnych viz.

«Što ŭ Biełarusi, što ŭ Rasii pamiežniki, pa-mojmu, zaŭsiody byli vysokimi prafiesijanałami», — zaznačyŭ Mirončyk.

Bolš za toje, u dźviuch krain jość adziny śpis nieŭjaznych, dadaŭ pres-sakratar MZS Biełarusi. Pry ŭjeździe zamiežniki atrymlivajuć mihracyjnyja karty adzinaha dla Biełarusi i Rasii ŭzoru, a pry vyjeździe — abaviazanyja ich pradjaŭlać.

«Heta značyć lubyja złoŭžyvańni dosyć lohka vyjaŭlajucca i karajucca. My ličym, što sistema, jakaja isnuje ŭžo amal 20 hadoŭ, efiektyŭnaja, razumnaja i dastatkovaja z punktu hledžańnia zabieśpiačeńnia biaśpieki. Pry hetym jana nie adpudžvaje dobrasumlennych padarožnikaŭ, biznesmienaŭ, turystaŭ, aŭtapieravozčykaŭ. My jaje ŭvieś čas ŭdaskanalvajem», — akcentavaŭ Mirončyk.

Pa słovach pres-sakratara, rasijski bok ciapier ubačyŭ prablemu tam, dzie «nie bačyŭ jaje dva dziasiatki hadoŭ», a mienavita — u adsutnaści mižnarodnych punktaŭ propusku na miažy Biełarusi i Rasii.

«Kali našy partniory ličać, što heta dla ich niazručna, tady treba vyrašać hetaje pytańnie. Varyjantaŭ niekalki. Nie tolki stvareńnie rasijanami punktaŭ propusku, ale i ŭzajemnaje pryznańnia viz dla metaŭ tranzitu. Darečy, hety miechanizm, stvorany ŭ ramkach SND, prymianiaŭsia i rasijskim, i biełaruskim bakami, ale ŭ pačatku 2000-ch mienavita Maskva pieršaj ad jaho admoviłasia.

Ciapier hetuju temu abmiarkoŭvajuć biełaruskija i rasijskija śpiecyjalisty, adznačyŭ Mirončyk. «Jaki varyjant vypracujuć ekśpierty, ci budzie heta adzinaja vizavaja prastora albo niešta inšaje — pahladzim», — padkreśliŭ pradstaŭnik MZS.

Pavodle jaho słoŭ, dla Biełarusi pryncypova, kab u toj čas, pakul situacyja vyrašajecca, nie rabilisia «rezkija adnabakovyja dziejańni, jakija stvarajuć prablemy dla hramadzian trecich krain i dla našych kampanij aŭtapieravozčykaŭ, avijapieravozčykaŭ, turahienctvaŭ i h.d.».

Jak raniej paviedamlałasia, užo niekalki miesiacaŭ Rasija razvaročvaje na miažy zamiežnikaŭ, jakija jeduć praź Biełaruś, i adpraŭlaje za sotni kiłamietraŭ u mižnarodnyja punkty propusku. I choć prablema nie zakranuła mižnarodnych aŭtapieravozčykaŭ, masavaje viartańnie hramadzian na raniej prazrystaj miažy nanosić škodu jak imidžu, tak i kaźnie Biełarusi.

Svajo rašeńnie Rasija patłumačyła tym, što «situacyja ŭ śviecie kardynalna źmianiłasia» i «rezka ŭzraśli ryzyki, źviazanyja z terarystyčnymi, mihracyjnymi pytańniami».

Na niadaŭnich pieramovach u Minsku kiraŭnik MZS Rasii Siarhiej Łaŭroŭ zajaviŭ, što Maskva «vielmi daŭno prasoŭvaje ideju adzinaj vizavaj prastory».

Łaŭroŭ: Rasija nie vyklučaje adkryćcia časovych mižnarodnych punktaŭ propusku na miažy ź Biełaruśsiu

Клас
Панылы сорам
Ха-ха
Ого
Сумна
Абуральна