Siońnia ŭ Minsku adbyłasia pres-kanfierencyja Uładzimira Sałaŭjova — viadomaha rasijskaha prapahandysta.
BiełaPAN
Sałaŭjoŭ viadzie na telekanale «Rośsija 1» palityčnyja prahramy «Pajadynak» i «Viečar u niadzielu». Aktyŭna padtrymlivaje palityku Uładzimira Pucina. Jaho vystup u Pałacy Respubliki pačniecca ŭ 19.00.
Pra svoj namier vyjści ŭviečary 25 listapada da Pałaca Respubliki zajavili aktyvisty «Maładoha frontu». Takim čynam jany źbirajucca prademanstravać staŭleńnie mnohich biełarusaŭ da «rasijskaha prapahandysta Sałaŭjova», a taksama da «prapahandy vajny i nianaviści, jakija hučać z vusnaŭ Kramla i rasijskich ŚMI».
Sałaŭjoŭ prakamientavaŭ namier maładafrontaŭcŭ:
«Dastatkova prosta nie kuplać kvitki i nie prychodzić na moj vystup i demanstratyŭna vyklučać televizar. Jany hetym chočuć skazać, što biełaruski narod niehaścinny? Jon haścinny. A toje, što ludzi majuć prava stavicca da kožnaha pa-roznamu, heta taksama vidavočna. Tak jany chočuć siabie pakazać? Mianie pahladzieć? Ci zrabić što? Kali jany prychilniki svabody, to, jak ludzi pieršapačatkova svabodnyja, jak było skazana vialikim francuzam, «ja hatovy addać žyćcio za vaša prava vykazvać vaša mierkavańnie».
Čaho jany chočuć? Chočuć mnie pakazać, što jany jość? Nu, dobra, ja rady za ich. Ja nie čyrvoniec, kab usim padabacca. Tak što, staŭlusia da hetaha vielmi spakojna.
A tym bolš, siońnia piatnica, viečar, hulańni, płošča. Z takimi ciažkimi emocyjami chaj zojduć u chram Usich Śviatych. Tam dobra, pryhoža».
Žurnalisty zadali pytańnie pra vypuski telepieradač, jakija vyjšli na hetym tydni ŭ efiry rasijskaha Pieršaha kanała i telekanała «Źviezda». U ich pieravažna ŭ niehatyŭnym klučy zakranałasia tema Biełarusi ŭ suviazi z ukrainskimi padziejami, a taksama vykazvałasia niezadavolenaść biełaruskaj histaryjahrafijaj.
Pavodle słoŭ Sałaŭjova, jon nie hladzieŭ hetyja vypuski. «Što za durni, chto heta rabiŭ i navošta? Jość kuča idyjotaŭ, jakija čamuści sprabujuć padniać rejtynh šou za košt taho, kab znajści niešta, vysmaktać z palca. Viadoma, ja maju na ŭvazie maich kaleh pa Pieršym kanale i čymści jašče. Heta biezadkazna i nieprystojna», — zajaviŭ viadoŭca.
Na rasijskim telebačańni, pavodle jaho słoŭ, niaredka ŭźnikaje situacyja, kali tema raździmajecca z uziataj u internecie ŭryŭkavaj infarmacyi, jaje abmiarkoŭvajuć mnohija ŚMI. «A potym hladziš — chodziać z šou ŭ šou adny i tyja ž ludzi, adny i tyja ž temy… Niejkaja dzikaja łuchta», — skazaŭ Sałaŭjoŭ.
Pavodle jaho słoŭ, z-za hetaha ludziam moža zdacca, što takim čynam vyražajecca dziaržaŭnaja palityka Rasii. Ale heta nie źjaŭlajecca praŭdaj, padkreśliŭ žurnalist. «Vy na poŭnym surjozie ličycie, što ludzi, jakija siadziać u Rasii na telebačańni, vyvučajuć palityčny paradak dnia i pad jaho stvarajuć adnosiny? Ci možacie sabie ŭjavić, kolki prahram na telebačańni? Telebačańnie pracuje zusim pa inšym pryncypie», — adznačyŭ Sałaŭjoŭ.
Takija pieradačy nie treba hladzieć, parekamiendavaŭ viadoŭca. Rasijskaje telebačańnie, pavodle jaho słoŭ, ujaŭlaje saboj «dzikuju kolkaść telekanałaŭ i miljon prahram, jakija robiać vielmi roznyja ludzi ź vielmi roznaj stupieńniu prafiesijanalizmu». Tak, kali hladzieć uvieś čas pieradačy pra zdaroŭje, to ŭźniknie adčuvańnie, što «ŭsia kraina ciažka chvoraja i jaje treba lačyć ad dzikaha naboru chvarob», a kali hladzieć tolki palityčnyja prahramy, to «paŭstanie adčuvańnie, što śviet zaŭtra abryniecca».
Na kožnym telekanale jość «svoj nabor idyjotaŭ», jakija nie ŭśviedamlajuć, jakaja adkaznaść na ich lažyć pierad hramadstvam, zajaviŭ Sałaŭjoŭ. «Na žal, televizijny biźnies uładkavany takim čynam, što talent dramatyzacyi stanovicca vyšejšym za ŭsio. Heta absalutnaja vajna za rejtynh», — padkreśliŭ jon.
U adkaz na pytańnie pra Alaksandra Łukašenku Sałaŭjoŭ zajaviŭ, što asabista ŭ jaho niama nijakaha asablivaha staŭleńnia da aficyjnaha biełaruskaha lidara, bo Łukašenka — «nie jaho prezident».
«Ja jaho nijak nie aceńvaju jak žurnalist, ja nikoli ŭ jaho nie braŭ intervju. U mianie ź im nie było nikoli mahčymaści karelavać. Ja Łukašenku ni razu ŭ žyćci žyŭcom nie bačyŭ», — rastłumačyŭ jon.
U toj ža čas Sałaŭjoŭ pryznaŭsia, što adčuvaje da jaho pavahu jak «da prezidenta bratniaj krainy», narod jakoj jon ličyć «vydatnym». Aceńvać palityku łaviravańnia Łukašenki pamiž Rasijaj i Zachadam televiadoŭca nie staŭ.
«Chto ja, kab aceńvać dziejnaść vašaha prezidenta dla vašaj ža krainy? Kali hety prezident vykonvaje mižnarodnyja abaviazacielstvy, i narod im zadavoleny, to hetaje pytańnie nie da mianie, a da jaho narodu», — skazaŭ jon.
Pavodle słoŭ Sałaŭjova, u pieravažnaj bolšaści rasijanie ličać adnosiny ź Biełaruśsiu «cudoŭnymi», a samu Biełaruś «u Rasii vielmi lubiać». Hramadzianie RF, adznačyŭ jon, ŭsprymajuć biełaruskaha prezidenta «vielmi łaskava». «Nu voś jon u chakiej hulaje, havoryć śmiešna, u nas kuča aniekdotaŭ pra Łukašenku… Taki narodny piersanaž», — dadaŭ Sałaŭjoŭ.
Adkazvajučy na pytańnie, ci chacieŭ by jon zrabić intervju z Alaksandram Łukašenkam, Sałaŭjoŭ adkazaŭ: «Tearetyčna, napeŭna, tak, ale praktyčna da hetaha nie dachodzili ruki». «Niekali my adpraŭlali zapyt, hadoŭ dziesiać tamu, ale tam niejkija padstavy byli. Apošnim časam — nie», — padsumavaŭ jon.
U mahčymaść dziaržaŭnaha pieravarotu pa ŭkrainskim scenary Sałaŭjoŭ nie vieryć.
«Pryščepka Ukrainy — jana padziejničała na ŭsich kiraŭnikoŭ, — zajaviŭ Sałaŭjoŭ. — Ciapier usie ŭsio vielmi vyrazna razumiejuć, a hałoŭnaje — dla naroda spracavała, tamu što — što atrymaŭ ŭkrainski narod za try hady? Karunkavych majtkaŭ i Jeŭropy ja niešta nie baču. Nie, ale viadoma, asobnym žurnalistam, jakija žyvuć na hranty, pašancavała».
Sałaŭjovu raspaviali, što biełarusy siońnia nazirajuć za staŭleńniem Rasii da Ukrainy i častkova prajecyrujuć heta staŭleńnie na siabie. Na što televiadoŭca adkazaŭ:
«A ŭ vas fašysty źbirajucca pryjści da ŭłady? Jany chočuć zabivać ruskich? Jany chočuć zabaraniać movu, adradžać vobrazy tych, chto spalvaŭ Biełaruś? Što mienavita vy na siabie prajecyrujecie?»
Pavodle słoŭ Sałaŭjova, staŭleńnie Rasii da Ukrainy možna nazvać «vydatnym», tam «niama nijakich dyskryminacyjnych zakonaŭ u adnosinach da ŭkraincaŭ, jakija pražyvajuć u Rasii». U Rasii, zapeŭniŭ televiadoŭca, vitajuć pryjezdžych ukraincaŭ, jakija tam «pracujuć, atrymlivajuć zarpłatu, pierapraŭlajuć hrošy, niahledziačy na toje, što ŭkrainskija ŭłady sprabujuć čynić im u hetym pieraškody».
Ukraina, zajaviŭ Sałaŭjoŭ, ź`iaŭlajecca «niezaležnaj dziaržavaj z 1991 hoda» i nikoli ad Rasii, «akramia dabra, ničoha bolš nie bačyła». «My nie źbirajemsia ŭvodzić tanki ŭ Kijeŭ, u nas ža nie ŭsie žyrynoŭskija», — dadaŭ jon.
«A čaho Biełarusi chvalavacca? Heta vaša dziaržava, vaša žyćcio. Adnosiny [pamiž Rasijaj i Biełaruśsiu] vydatnyja, pavažajem vielmi. U nas jość ahulnaja histaryčnaja pamiać, u pryvatnaści, heta pieramoha ŭ Vialikaj Ajčynnaj vajnie. Mała chto, jak biełaruski narod, moža pra heta raskazać, tamu što mała chto tak paciarpieŭ. Pa jakoj byłoj savieckaj respublicy, a ciapier niezaležnaj krainie, tak strašna prajšłasia vajna?
Mnie zdajecca, što ŭžo daŭno para ŭśviadomić — vy vydatny, svabodny i niezaležny narod. Vy žyviacie vašym žyćciom, heta vaš vybar», — skazaŭ na zakančeńnie Sałaŭjoŭ.
