Da šaści hadoŭ pazbaŭleńnia voli z kanfiskacyjaj majomaści prysudžanyja dźvie buchhałtarki adnaho ź sielhaspradpryjemstvaŭ Sieńnienskaha rajona, jakija nanieśli kałhasu škodu ŭ 140 000 rubloŭ, paviedamlajepres-słužba UUS Viciebskaha abłvykankama sa spasyłkaj na UBEP.
Kryminalnaja sprava ŭ dačynieńni da dźviuch žycharak Sieńnienskaha rajona była raspačataja dva hady tamu. Pravaachoŭnyja orhany vyjavili, što žančyny, jakija zajmali pasady hałoŭnaha buchhałtara i buchhałtara kałhasa, sa studzienia 2011 hoda pa lipień 2014 hoda afarmlali fiktyŭnyja dakumienty na atrymańnie roznych tavaraŭ dla patreb pradpryjemstva.
Adnak nabytyja za košt pradpryjemstva pradukty i bytavaja chimija pa pryznačeńni nie ŭžyvalisia, a vykarystoŭvalisia žančynami ŭ asabistych metach. Pry pieratrusie pa miescy žycharstva hałoŭnaj buchhałtarki i padparadkavanaj joj supracoŭnicy byli vyjaŭlenyja šmatlikija składy zakuplenych nibyta dla patreb kałhasa tavaraŭ: harbaty, kavy, raślinnaha aleju, roznych kansiervaŭ, parfumy i bytavoj chimii.
Sudom Sieńnienskaha rajona byłyja buchhałtarki za kradziež šlacham złoŭžyvańnia słužbovymi paŭnamoctvami byli asudžanyja da šaści hadoŭ pazbaŭleńnia voli z adbyvańniem pakarańnia ŭ papraŭčaj kałonii ahulnaha režymu z kanfiskacyjaj majomaści. Prysud ustupiŭ u zakonnuju siłu.
