Mižnarodny alimpijski kamitet abviaściŭ čarhovy śpis atletaŭ, jakija padvierhlisia sankcyjam paśla pierapravierki dopinh-probaŭ Alimpijadaŭ 2008 i 2012 hadoŭ. I znoŭ nie abyšłosia biez proźviščaŭ biełaruskich spartsmienaŭ

Na hety raz Biełaruś zhubiła jašče dva miedali piekinskaj Alimpijady-2008, jakaja ličyłasia samaj paśpiachovaj u suvierennaj historyi krainy.

minutouno.com

minutouno.com

Załatoj uznaharody pazbaŭlenaja alimpijskaja čempijonka Piekina-2008 u kidańni mołata Aksana Miańkova, a siarebranuju ŭznaharodu zahadana viarnuć šturchalnicy jadra Natalli Michnievič.

Pierapravierki piekinskaj dopinh-proby Aksany Miańkovaj z dapamohaj najnoŭšych technałohij pakazała najaŭnaść u arhaniźmie spartsmienki anabaličnych steroidaŭ dehidrachłormietyłtestasteronu (turynabołu) i aksandrałonu.

Akramia taho, stanoŭčy vynik pryniesła i pierapravierka dopinh-proby Aksany Miańkovaj z łondanskaj Alimpijady-2012, dzie jana zaniała 7-je miesca. Hety vynik biełaruski taksama byŭ anulavany. U analizach znoŭ vyjaŭleny usio toj ža dehidrachłormietyłtestasteron (turynaboł) i stanazałoł.

Natalla Michnievič trapiłasia na anabolikach mietandyjenonie i stanazałole, jakija vyjaŭlenyja ŭ piekinskaj sprobie.

Anulavanyja vyniki jašče troch pradstaŭnikoŭ Biełarusi, jakija fihurujuć u apublikavanym siońnia śpisie.

Šturchalnik jadra Pavieł Łyžyn u Piekinie-2008 zaniaŭ 4-je miesca. U jaho sprobie znojdzieny dehidrachłormietyłtestastieron (turynaboł).

Śviatłana Usovič zaniała ŭ Piekinie-2008 23-je miesca ŭ biehu na 800 mietraŭ. U jaje sprobie taksama znojdzieny dehidrachłormietyłtestasteron.

Stanoŭčaja proba Śviatłany Usovič pierakreślivaje nadziei biełaruskaj kamandy atrymać miedal Alimpijady-2008 u estafiecie 4x400 m, dzie naša kamanda (Hanna Kozak, Iryna Chlustava, Iłona Usovič, Śviatłana Usovič) z nacyjanalnym rekordam (3 chviliny 21,85 siekundy) zaniała tady 4-je miesca. Sprava ŭ tym, što srebra ŭ toj estafiecie pazbaŭlenyja rasijanki - z-za stanoŭčaj dopinh-proby ich biahuchi Anastasii Kapačynskaj. Kali b proby biełarusak byli čystyja, jany mahli b raźličvać na bronzu.

U apublikavanym ža siońnia śpisie jość biełaruska Anastasija Mirončyk-Ivanova, jakaja zaniała 7-je miesca ŭ skačkach u daŭžyniu na Hulniach-2012 u Łondanie. U jaje analizach taksama znojdzieny turynaboł.

Nahadajem, što 26 kastryčnika MAK abviaściŭ pra pazbaŭleńnie jašče dźviuch uznaharod dvuch biełaruskich miedalistaŭ Alimpijady-2008 u Piekinie. Pierapravierki probaŭ vaśmihadovaj daŭnaści vyjaviła zabaronienyja rečyvy ŭ testach siarebranaha pryziora Hulniaŭ-2008 Andreja Rybakova i bronzavaj miedalistki Anastasii Novikavaj, dla jakoj heta ŭžo treci dopinhavy prakoł u karjery.

Raniej bronzy Piekina-2008 byŭ pazbaŭleny šturchalnik jadra Andrej Michnievič.

Paśla čarhovaj porcyi dopinh-prakołaŭ kolkaść biełaruskich miedaloŭ Alimpijady-2008 usochła da 14 uznaharod — 3 załatyja, 4 siarebranyja, 7 bronzavych.

Paśla finišu Hulniaŭ-2008 u biełarusaŭ było 19 uznaharod - 4 załatyja, 5 siarebranych, 10 bronzavych.

Ciapierašniaj vosieńniu MAK taksama pazbaviŭ Biełaruś 2 miedaloŭ łondanskaj Alimpijady-2012 - bronzavyja ŭznaharody zahadana viarnuć Marynie Škiermankovaj i Irynie Kulešy.

Клас
Панылы сорам
Ха-ха
Ого
Сумна
Абуральна