Daniel Krutcyna. Fota satio.by

Daniel Krutcyna. Fota satio.by

«Navošta krainie, u jakoj niama reform, elitnyja kadry?» Hetaje pravakacyjnaje pytańnie zadaŭ kiraŭničy partnior Civitta ŭ SND, niezaležny čalec Naziralnaj rady Banka raźvićcia Biełarusi Daniel Krutcyna padčas čaćviortaj štohadovaj hałandska-polska-biełaruskaj kanfierencyi.

Sustreča ekśpiertaŭ ŭ halinach adukacyi i biznesu prajšła 13 śniežnia ŭ Minsku.

Padčas sioletniaj kanfierencyi «Adukacyja jak prava čałavieka: madernizacyja vyšejšaj adukacyi ŭ adkaz na vykliki XXI stahodździa» (arhanizatary — Centr Astrahorskaha, ambasady Polščy i Niderłandaŭ) šmat uvahi nadali pytańniam biznes-adukacyi ŭ Biełarusi. Padčas svajho vystupu Krutcyna skancentravaŭsia na ŭłasnych nazirańniach, jakija tyčacca asablivaściaŭ biełaruskich prafiesijnych kadraŭ.

«My pracujem nie tolki ŭ Biełarusi, ale taksama ŭ krainach Prybałtyki. U nas jość standartny test dla ŭsioj hrupy kampanij. Admietna, što ŭ biełaruskich kandydataŭ mocnyja analityčnyja zdolnaści. Kali sa 100 bałaŭ u Prybałtycy pretendenty ŭ siarednim nabirajuć 52 bały, to ŭ Biełarusi — 61. Heta vialikaje dasiahnieńnie. Adzin čałaviek u Biełarusi nabraŭ 98 bałaŭ, što ŭvohule blizka da hienijalnaści, — raskazaŭ Krutcyna.

— Z druhoha boku, u biełaruskich kandydataŭ drenna raźvityja kamunikacyjnyja navyki. Jany nie viedajuć, jak vystupać, jak farmulavać i adstojvać ułasnuju dumku. Jany nie viedajuć, jak siabie pradavać. Usie biełarusy, jakich my naniali mieniedžarami prajektaŭ, majuć zamiežnuju adukacyju».

Daniel robić vysnovu, što, mabyć, biełaruskija ŭniviersitety nie stvarajuć patrebnuju bazu dla taho, kab być kansultantam mižnarodnaha ŭzroŭniu. Jon zaŭvažaje i niebiaśpiečnuju tendencyju dla Biełarusi: kadry, jakija ŭmiejuć siabie pradać, źjazdžajuć u bolš prasunutyja krainy.

«Čaho dakładna nie chapaje ŭ Biełarusi, dyk heta instytuta, jaki b rychtavaŭ elitnych kadraŭ, zdolnych pracavać na mižnarodnym uzroŭni, — davodzić Krutcyna. — Jak, da prykładu, Stakholmskaja škoła ekanomiki ŭ Ryzie. Amal pałova našych top-mieniedžaraŭ u kansałcinh-biznesie skončyli mienavita hetuju Škołu. Z druhoha boku, moža, heta i nie treba?

U inšych krainach vialikaja pahroza, što, kali našy chłopcy zrobiać pracu jakasna, to jany i zastanucca ŭ klijenta. U Biełarusi, akramia siektara IT, ja takoj pahrozy ŭvohule nie baču. Vielmi mała kampanij, zdolnych intehravać u siabie dobryja kadry mižnarodnaha ŭzroŭniu. Navošta krainie, u jakoj niama reform, elitnyja kadry? Ujavicie, što vypusknik takoj škoły pajšoŭ pracavać u dziaržaŭnuju ŭstanovu z adpaviednym zarobkam».

Dyrektar Instytuta biznesu i mieniedžmientu technałohij BDU, prafiesar Uładzimir Apanasovič u adkaz pryvioŭ prykład Paŭdniovaj Karei.

«Na maju dumku, heta jakraz vyratavańnie dla našaj krainy, — skazaŭ Apanasovič. — Davajcie zirniom na Kareju. Chto viedaŭ pra jaje 30 hadoŭ tamu? U peŭny momant lidar hetaj krainy vyrašyŭ, što treba ŭsio ŭkładvać u adukacyju, u kampietencyju ludziej. Ciapier Kareja na pieršych radkach rejtynhaŭ».

Tym časam načalnik upraŭleńnia ekanomiki inavacyjnaj dziejnaści Ministerstva ekanomiki Biełarusi Dźmitryj Krupski miarkuje, što farmalnaja adukacyja zžyvaje siabie ŭ pryncypie.

«Temp źmianieńniaŭ, jakija adbyvajucca ŭ śviecie, nastolki chutki, što navat tyja praktyki, jakija vykarystoŭvajucca ŭ viadučych biznes-škołach śvietu, časta nie paśpiavajuć za imi. Ja dapuskaju, što śviet sutykniecca z tym, kali treba budzie vykarystoŭvać inšyja sposaby, instrumienty navučańnia. Dla mianie, naprykład, vidavočna, što farmalnaja adukacyja zžyvaje siabie. Pryčym nie važna, u pryvatnych arhanizacyjach ci dziaržaŭnych VNU. Ja dobra razumieju, što tolki samaadukacyja dazvalaje mnie padtrymlivać prymalny ŭzrovień kampietencyi. Ale heta moj ułasny dośvied, jon moža nie tyčycca ŭsich», — adznačyŭ Krupski.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?