U Madrydzie 16 śniežnia adbyłasia ŭračystaja cyrymonija adkryćcia pasolstva Respubliki Biełaruś u Karaleŭstvie Ispanija.

U suviazi z pačatkam dypłamatyčnaj prysutnaści Biełarusi ŭ Ispanii byŭ praviedzieny šerah palityčnych, ekanamičnych i kulturnych mierapryjemstvaŭ. 15 i 16 śniežnia z rabočym vizitam u Ispanii znachodzicca biełaruskaja delehacyja na čale z namieśnikam ministra zamiežnych spraŭ Jaŭhienam Šastakovym.

Jak paviedamlaje pres-słužba biełaruskaha pasolstva ŭ Francyi, Šastakoŭ pravioŭ pieramovy ź dziaržaŭnym sakratarom pa zamiežnych spravach Ministerstva zamiežnych spraŭ i supracoŭnictva Ispanii Ihnasia Ibaniesam. Abmierkavany šyroki śpiektr pytańniaŭ dvuchbakovaha supracoŭnictva. Asablivaja ŭvaha była nadadzienaja aktyvizacyi kantaktaŭ na ŭzroŭni kiraŭnictva ministerstvaŭ zamiežnych spraŭ dźviuch krain, raźvićcia handlova-ekanamičnaha supracoŭnictva, pašyreńnia dahavorna-pravavoj bazy, realizacyi sumiesnych kulturnych prajektaŭ.

Baki damovilisia najbližejšym časam padpisać mižuradavy miemarandum ab supracoŭnictvie ŭ śfierach ekanomiki i pramysłovaści, jakim praduhledžvajecca stvareńnie sumiesnaj handlova-ekanamičnaj kamisii, a taksama miemarandum ab supracoŭnictvie pamiž ministerstvami zamiežnych spraŭ i pahadnieńnie ab supracoŭnictvie pamiž ministerstvami justycyi Biełarusi i Ispanii.

15 śniežnia ŭ Madrydzie adbyłasia sustreča člena Savieta Respubliki Nacyjanalnaha schodu Biełarusi, rektara Biełaruskaj dziaržaŭnaj akademii muzyki Kaciaryny Dułavaj z členami kamisii pa mižnarodnych spravach sienata Ispanii. Byli abmierkavanyja pytańni raźvićcia mižparłamienckaha supracoŭnictva, a taksama supracoŭnictva ŭ ekanamičnaj i kulturnaj śfierach.

16 śniežnia ad imia pasła Biełarusi ŭ Ispanii Paŭła Łatuški byŭ dadzieny ŭračysty pryjom z nahody adkryćcia pasolstva. Na pryjomie prysutničała bolš za 100 pradstaŭnikoŭ dypłamatyčnaha korpusa, akredytavanaha ŭ Madrydzie, palityčnaj elity i hramadskaści Ispanii, dziełavych kołaŭ i biełaruskaj dyjaspary ŭ hetaj krainie.

Na pryjomie prysutničali hienieralny sakratar pa zamiežnych spravach MZS Ispanii Ihnasia Ibanies i hienieralny dyrektar Suśvietnaj turysckaj arhanizacyi Taleb Ryfai.

Hałoŭnymi zadačami biełaruskaj dypmisii ŭ Ispanii stanie aktyvizacyja handlova-ekanamičnaha i inviestycyjnaha supracoŭnictva, pašyreńnie mižkulturnaha dyjałohu i supracoŭnictva ŭ inšych humanitarnych śfierach.

U ramkach mierapryjemstvaŭ, prymierkavanych da inaŭhuracyi dypłamatyčnaj prysutnaści Biełarusi ŭ Ispanii, delehacyja departamienta enierhaefiektyŭnaści Dziaržaŭnaha kamiteta pa standartyzacyi Biełarusi i šerahu biełaruskich pradpryjemstvaŭ praviała pieramovy z uradavymi strukturami Ispanii i ispanskimi pradpryjemstvami pa pytańniach raźvićcia supracoŭnictva ŭ śfierach enierhaefiektyŭnaści i enierhaźbieražeńnia. Dasiahnutyja damoŭlenaści ab raspracoŭcy sumiesnych inviestycyjnych prajektaŭ na terytoryi Biełarusi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?