Siarod asnoŭnych kvalifikacyjnych patrabavańniaŭ da kandydataŭ u rektary EHU jość 1) volnaje vałodańnie anhlijskaj movaj, 2) minimum piacihadovy vopyt pracy na vysokaj kirujučaj pasadzie ŭ halinie vyšejšaj adukacyi, 3) vopyt raboty sa strukturami ES.

U toj ža čas vałodańnie biełaruskaj, ruskaj movaj moža być, a moža nie być. Jano prosta «ŭličvajecca ŭ jakaści stanoŭčaha faktaru». Jak i «viedańnie łakalnaha/rehijanalnaha sacyjakulturnaha kantekstu dy/albo vopyt univiersiteckaj pracy ŭ postsavieckim rehijonie Uschodniaj Jeŭropy ci krain Bałtyi».

My zapytalisia ŭ byłych kandydataŭ u rektara Taćciany Ščytcovaj, Alaksandra Milinkieviča, a taksama byłoha kiraŭnika Sienata Paŭła Cieraškoviča, jak pračytvać hetyja krytery. 

Apytanyja nami schilajucca da dumki, što krytery vyznačanyja takim čynam, kab na pasadu rektara EHU mahli pretendavać abo ciapierašnija kiraŭniki ŭniviersiteta, abo piensijaniery z krain Zachodniaj Jeŭropy.

«Vopyt raboty na kirujučaj pasadzie» adsiakaje ŭsich patencyjnych kandydataŭ z hramadzianskaj supolnaści i ludziej z apazicyjnymi pohladami, pazbaŭlenych mahčymaści pracavać va ŭniviersitetach Biełarusi. Moŭny barjer adsiakaje šerah inšych kandydataŭ.

Pavieł Cieraškovič: «Uražańnie, što kandydat užo znojdzieny»

Pavieł Cieraškovič uznačalvaŭ Sienat EHU, pakul nie ŭvajšoŭ u kanflikt z rektaram Anatolem Michajłavym. 

Pavieł Cieraškovič uznačalvaŭ Sienat EHU, pakul nie ŭvajšoŭ u kanflikt z rektaram Anatolem Michajłavym. 

Na dumku byłoha kiraŭnika Sienata EHU Paŭła Cieraškoviča, krytery pry adbory budučaha rektara padabranyja tak, kab toj, chto braŭ udzieł u minułych vybarach, nie zmoh skroź ich prajści.

Cieraškovič pierabiraje. Alaksandr Milinkievič? Adpadaje, bo nie maje 15-hadovaha stažu vykładańnia sacyjalna-humanitarnych dyscyplin i nie vałodaje anhielskaj movaj svabodna. Pa pieršym krytery nie prachodzić i Daryus Udrys, jaki byŭ prarektaram, ale vykładańniem nikoli nie zajmaŭsia.

«U mianie ŭvohule takoje ŭražańnie, što kandydat užo znojdzieny, — kaža spadar Pavieł. — Z dapamohaj vysunutych kryteraŭ možna skłaści jaho partret. Chutčej za ŭsio, heta jeŭrapiejec, tamu što patrebna viedańnie jeŭrapiejskaj prastory vyšejšaj adukacyi i taho, što tam adbyvajecca. Chutčej za ŭsio, heta piensijanier, jaki pracavaŭ nie ŭ samym viadomym univiersitecie, ale dośvied pracy prarektara ci rektara jon maje. Nieabaviazkovaje viedańnie kantekstu, biełaruskaj ci ruskaj movy jakraz i śviedčyć pra toje, što budzie nie biełarus».

Tym nie mienš, Cieraškovič adznačaje, što sama pracedura adboru kandydata na pasadu rektara ŭ paraŭnańni z papiarednimi vybarami značna palepšała.

«U minuły raz hetym zajmałasia Kiraŭničaja rada ŭniviersiteta, jakaja nie mieła na heta prava, — zaŭvažaje spadar Pavieł. — Byli brydkija zakulisnyja hulni, u vyniku, radu adpravili ŭ adstaŭku. Na hety raz adboram budzie zajmacca šviedskaje kadravaje ahienctva. Rašeńnie budzie prymać kamitet pa adbory ź siami asob, siarod jakich budzie troje pradstaŭnikoŭ akademičnaj supolnaści, u tym liku pradstaŭnik studenctva. Biezumoŭna, heta značny krok napierad u demakratyzacyi ŭniviersiteta».

Što budzie z univiersitetam dalej, Cieraškoviču kazać ciažka. Na jaho dumku, kali prahnoz spraŭdzicca i rektaram stanie pradstaŭnik jeŭrapiejskaj krainy, heta budzie aznačać dalejšuju palityku kałanijalnaha ŭniviersiteta ź niapeŭnymi metami, zadačami i ćmianaj budučyniaj.

«Kali ž rektaram stanie pradstaŭnik akademičnaj supolnaści, asabliva biełarus, to jość nadzieja, što ŭniviersitet nie tolki raźvierniecca ŭ bok Biełarusi, a vierniecca ŭ krainu. Ciapier vyžyvańnie ŭniviersiteta zaležyć ad hetaha. U emihracyi jon nie vyžyvie, heta absalutna zrazumieła», — ličyć Pavieł Cieraškovič.

Alaksandr Milinkievič: «EHU nie budzie biełaruskim univiersitetam, pra jaki my maryli»

Alaksandr Milinkievič. Fota dic.academic.ru.

Alaksandr Milinkievič. Fota dic.academic.ru.

Na dumku Alaksandra Milinkieviča, biełaruskija ŭniviersitety majuć peŭnyja pośpiechi ŭ techničnych navukach, adnak zbolšaha značna adstajuć ad siońniašnich tendencyj u humanitarnych, sacyjalnych ci ekanamičnych.

 «Chaciełasia b, kab EHU byŭ centram biełaruskaj dumki. Centram, jaki viadzie navukovyja daśledavańni pa pieramienach, transfarmacyi Biełarusi, — kamientuje Milinkievič. — Ciapier EHU idzie inšaj darohaj. Ja nie maju prava davać parady siońniašnim albo budučym kiraŭnikam ci Sienatu EHU, kazać, jakim być univiersitetu. Ale dla mianie vidavočna, što, na žal, EHU nie budzie biełaruskim univiersitetam, pra jaki my maryli».

Spadar Alaksandr miarkuje, što ŭniviersitet moža stać placoŭkaj dla ruskamoŭnych z Bałtyi, Ukrainy, Biełarusi.

«Napeŭna, va ŭniviersitecie zastanucca kursy na biełaruskaj movie, bo jość vykładčyki, dla jakich heta važna. Ale havorka nie pra toje, kab vykładčyki i studenty razmaŭlali pa-biełarusku, a pra toje, jakuju rolu hety ŭniviersitet budzie adyhryvać u transfarmacyi biełaruskaj sistemy adukacyi, — tłumačyć Milinkievič. — Jość šmat prablem ź biełaruskaj adukacyjaj. Biełarusy adny ź lidaraŭ pa mihracyi moładzi, jakija źjazdžajuć za viedami za miažu. Adnak bolšaść atrymlivajuć adukacyju ŭ Rasii. Nam by chaciełasia, kab byŭ bolšy bałans pamiž uschodniaj i zachodniaj mihracyjaj moładzi pa viedy. Na žal, siońnia heta nie tak. I hetaja rola EHU fundamientalnaja i važnaja».

Taćciana Ščytcova: «Vielmi važna, kab my ŭsie mahli havaryć na adnoj movie»

Prafiesarka Taćciana Ščytcova zmahałasia za pasadu z Devidam Polikam. 

Prafiesarka Taćciana Ščytcova zmahałasia za pasadu z Devidam Polikam. 

Niekatoryja z uviedzienych filtraŭ pry adbory na pasadu rektara ŭ doktara fiłasofskich navuk, prafiesara EHU Taćciany Ščytcovaj vyklikajuć nierazumieńnie ci navat niazhodu.

«Najpierš heta tyčycca punkta pra movu. Padrychtoŭka dakumienta, farmuloŭka kryteraŭ praduhledžvała niekalki etapaŭ, u tym liku dyskusii, abmierkavańni i z supracoŭnikami ŭniviersiteta. Ja nastojvała na tym, što viedańnie ruskaj ci biełaruskaj movy musić być abaviazkovaj umovaj, sprabavała arhumientavać heta, ale, na žal, u adnaznačny kryter heta nie vyliłasia, zastałosia ŭ farmuloŭcy «pažadana». Na moj pohlad, heta stratehičnaja pamyłka», — ličyć spadarynia Taćciana.

Na dumku prafiesara, pa-pieršaje, heta važna dla vybudoŭvańnia zdarovych, praduktyŭnych adnosin z akademičnaj supolnaściu, pačynajučy ad kantaktaŭ sa studentami i zakančvajučy dyjałoham z čalcami Sienatu, vykładčykami i navukovymi kadrami va ŭniviersitecie.

Ščytcova zaŭvažaje, što EHU ŭžo maje dosyć niehatyŭny dośvied pracy z kiraŭnikami, top-mieniedžarami, jakija nie vałodali ni ruskaj, ni biełaruskaj movami.

«Tady i sam kiraŭnik, i akademičnaja supolnaść apynajucca ŭ kontrpraduktyŭnaj pastcy. Atrymlivajecca, što pamiž nami i kiraŭnikom, jaki prymaje važnyja rašeńni, akazvajecca vuzkaja hrupa pieramoŭščykaŭ, jakija nibyta pavinny reprezientavać pohlady akademsupolnaści, ale nasamreč hetaha nie robiać. Tut treba ŭzhadać prablemu, jakaja, na žal, zastajecca istotnaj dla EHU. Ja maju na ŭvazie, što bačańnie taho, jak varta ŭniviersitetu raźvivacca, jakija prymać biahučyja i stratehičnyja rašeńni, pradstaŭlenaje na ŭzroŭni akademsupolnaści, — heta adno bačańnie. A toje, što prasoŭvajuć i adstojvajuć našy aficyjnyja pradstaŭniki — časta zusim inšaje. I tut vielmi važna, kab my ŭsie — ad rektara da studentaŭ — mahli havaryć na adnoj movie», — tłumačyć spadarynia Taćciana.

Jana adznačaje, što bolšaść studentaŭ i vykładčykaŭ vałodajuć anhlijskaj, adnak usio adno takija znosiny prafiesar nie moža nazvać paŭnavartasnymi.

«Zusim niadaŭna ad nas syšoŭ Devid Polik. I my kazali pra toje, što jaho palityka, toje, jak jon vybudoŭvaŭ adnosiny, havorka ŭ tym liku i pra movu, prymusiła nas asensoŭvać situacyju ŭ terminach nieakałanijalnaj śviadomaści. Palityčnyja implikacyi śćviardžeńnia, što rektar nie pavinien u abaviazkovym paradku viedać movu toj supolnaści, u jakuju jon prychodzić, na žal, vielmi mocnyja. Dastatkova być choć krychu adukavanym, refleksiŭnym čałaviekam, kab ich ubačyć. Heta adnosiny, jakija vymušajuć uzhadvać dośvied kałanijalizmu», — davodzić doktar fiłasofskich navuk.

Što tyčycca biełarusacentryčnaści, to, na dumku prafiesara, tut pytańniaŭ być nie moža: univiersitet biełaruski pa faktu taho, chto ŭ im vučycca i vykładaje.

«Inšaja sprava, kali havorka idzie pra ŭznaŭleńnie suviaziaŭ z hramadzianskaj supolnaściu ŭ Biełarusi, stvareńnie novych suviaziaŭ i pašyreńnie prysutnaści ŭ Biełarusi. Tut, mnie padajecca, naš univiersitet moh by być ruchavikom dziakujučy suviaziam z hramadzianskaj supolnaściu. Uličvajučy napracoŭki, jakija jość va ŭniviersitecie, nam treba pašyrać supracoŭnictva z cełym šeraham NDA-arhanizacyj albo inšymi inicyjatyvami ŭ krainie. Na žal, pakul što heta adbyvajecca nie ŭ tym maštabie, u jakim chaciełasia b. Heta taksama zaležyć ad taho, jaki rektar pryjdzie», — zaŭvažaje spadarynia Taćciana.

Jana źviartaje ŭvahu i na novy skład Kiraŭničaj rady EHU, stratehičnaha orhana kiravańnia ŭniviersitetam, pryznačeńnie jakoha adbyłosia 14 śniežnia.

«Z boku akademičnaj supolnaści my nieadnarazova tranślavali našy pažadańni, rekamiendacyi adnosna taho, kab u Kirujučaj radzie byli pradstaŭniki biełaruskaj hramadzianskaj supolnaści. Na žal, heta nie było pryniata da ŭvahi, što mianie niepakoić. U śviatle hetaha možna pračytvać i praces vybaru novaha rektara», — adznačaje Taćciana Ščytcova.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?