Kataliki z Łyntupaŭ — miastečka na biełaruska-litoŭskim pamiežžy blizu Pastavaŭ — 27 śniežnia praz hazietu «Naša Niva» źviarnulisia z adkrytym listom da biskupa Viciebskaha Aleha Butkieviča, prosiačy ab kankretnym śviatary.
Nahodaj stała vyzvaleńnie ad pasady probašča parafii śviatoha Andreja Apostała ks. Paŭła Knureka — ekzarcysta Viciebskaj dyjacezii, jaki budzie pracavać u Viciebsku. Pakolki parafija čakaje novaha probašča, jana i vystupiła z ułasnaj prapanovaj — pryznačyć u Łyntupy ks. Uładzimira Šymkaviča, jaki słužyć u Dubroŭnie. Vierniki matyvujuć svaju prośbu tym, što ks. Uładzimir Šymkavič naradziŭsia ŭ Łyntupach.
Pad listom padpisalisia 103 vierniki.
«Na žal, ja nie bačyŭ hetyja proźviščy, samoha aryhinału lista. Dziŭna i toje, što list napisany na «apiaredžańnie», bo dekretu pra pieravod ks. Paŭła Knureka pakul niama, heta tolki płany arhanizacyi pracy ŭ dyjacezii, jakija nie nabyli pakul što zavieršanaha vyhladu, u jakim mahli b być pradstaŭlenyja viernikam», — prakamientavaŭ Krynica.info zvarot sam biskup Aleh Butkievič, padkreśliŭšy, što daviedaŭsia pra isnavańnie lista vyklučna z sajta «Našaj Nivy».
Na dumku biskupa Viciebskaha, pytańniaŭ z nahody napisańnia takoha lista paŭstaje šmat — i «vysokaja» litaraturnaja mova, na jakoj napisany list, i vybar vydańnia (čamu, naprykład, «Naša Niva», a nie «Sovietskaja Biełoruśsija», papularnaja u šmat kaho ź viaskovych čytačoŭ, čamu nie było sproby źviarnucca da biskupa «ŭ miežach Carkvy»).
«Nie mahu ahučyć nijakaj svajoj aficyjnaj dumki, akrom ździŭleńnia, — padkreśliŭ Aleh Butkievič, — bo luby inšy varyjant adkazu budzie vyhladać pryznańniem mahčymaści «cisnuć» takim čynam na biskupa kamu zaŭhodna, bo niaciažka zdahadacca, što najpierš ideja napisańnia adkrytaha lista naležała chutčej, adnoj aktyŭnaj asobie, a nie cełaj supolnaści».
Ksiondz Viačasłaŭ Barok: padajecca, ź viernikaŭ chtości «pažartavaŭ»
Pra «dziŭnaść i niezrazumiełaść» lista viernikaŭ kaža ekanom Viciebskaj dyjacezii ks. Viačasłaŭ Barok. «Zvarot krychu dziŭny — ź niekalkich pryčynaŭ. Pa-pieršaje čamu źjaŭlajecca adkryty list? Ci vierniki nie mahli sa svajoj prośbaj źviarnucca niepasredna da biskupa? Ja nie viedaju pra isnavańnie takoha zvarotu, skiravanaha da biskupa. Tearytyčna mahu dapuścić, što byŭ. Adnak, u takim vypadku ŭźnikaje pytańnie, čamu źjaviŭsia taki list? Bo ŭ Łyntupach probašč jość, i jaho pakul nichto nie zvalniaŭ z hetaha abaviazku. A kali nie zvalniaŭ, to nieviadoma, ci zvolniać. Heta było b pa-druhoje.
A pa treciaje, taksama ks. Uładzimir Šymkovič maje dekret na Dubroŭna, i jaho pakul nichto nie admianiaŭ. Bolš taho, śviatar u Dubroŭnie pačuvajecca ščaślivym u vykannańni svajoj śviatarskaj pasłuhi, i navat niekalki razoŭ prasiŭ biskupa dazvolić i nadalej pracavać u hetaj parafii i nikudy jaho nie pieranosić, — chacia biskup, razumiejučy niaprostuju situacyju śviataroŭ na terytoryi ŭschodniaj Biełarusi, prapanoŭvaŭ jamu źmianić miesca słužeńnie na adnu z parafij zachodniaj Biełarusi. Ale prapanovy zastalisia tolki prapanovami, bo ŭličyŭ dobruju volu i žadańnie śviatara.
Padajecca, taki zvarot viernikaŭ krychu zaŭčasny i pryvatna dla mianie — absalutna niezrazumieły. Naprošvajecca vysnova, što ź viernikaŭ chtości «pažartavaŭ» i zmanipulavaŭ ich dziejańniami, tamu i atrymałasia voś takaja niedarečnaja situacyja», — kamientuje ks. Viačasłaŭ Barok.
