U numary za 26 listapada hazieta Mazyrskaha rajvykankama «Žyćcio Paleśsia» nadrukavała artykuł aŭtarki Natalli Kanoplič «Da hetaj pary śnicca rodny dom…» Materyjał byŭ vytrymany ŭ stylistycy rasijskaj prapahandy.
Užo ŭ pieršym skazie było napisana: «Kali 9 Maja 2014 hoda ŭ ramkach karnaj apieracyi ŭkrainskaj armijaj u Maryupali byli rasstralanyja mirnyja hramadzianie, jakija pryjšli na śviatočnuju demanstracyju, kab adznačyć čarhovuju hadavinu Pieramohi u Vialikaj Ajčynnaj vajnie, Alaksandr i Julija Pyrko pryniali rašeńnie pakinuć svoj horad dziela spakoju, mira i budučyni svaich dziaciej».
Na hetuju publikacyju źviarnuŭ uvahu kalinkavicki aktyvist AHP Dzianis Rabianok. «Niejkaja Natalla Kanoplič z mazyrskaj haziety «Žyćcio Paleśsia». Dla jaje ŭkrainskija sałdaty, jakija zmahajucca za svaju dziaržavu suprać bandytaŭ i terarystaŭ, — heta karniki, jakija jeździać na BTRach pa Maryupalu i rasstrelvajuć z kulamiotaŭ mirnych žycharoŭ, što vyjšli śviatkavać 9 Maja. Čytaješ jaje opus i składvajecca ŭražańnie, što ŭkraincy — heta kryvažernyja nieludzi, meta jakich — zabivać, palić i bambić, što jany zachopniki i akupanty (u svajoj ža dziaržavie!), ad jakich treba vyratoŭvacca ŭ mirnaj i spakojnaj Biełarusi», — ličyć Rabianok.
Jon admysłova źjeździŭ u Mazyr, kab napisać skarhu ŭ rajonku. Na dniach ža atrymaŭ adkaz, u jakim redakcyja vybačajecca za dapuščanuju pamyłku.
«NN» pazvaniła ŭ Mazyr redaktarcy «Žyćcia Paleśsia» Łarysie Čornaj, kab prajaśnić situacyju. Łarysa Piatroŭna zapeŭniła, što z žurnalistkaj praviedzienaja prafiłaktyčnaja hutarka, joj vyniesienaja vymova, a taksama jana pazbaŭlenaja premii. «Pamyłka była, my na pieršaj pałasie prynieśli prabačeńni i ŭdakładnieńni», — skazała spadarynia Čornaja.
Cikava, što artykuł napisany pad ehidaj Upraŭleńnia viarchoŭnaha kamisara AAN pa pravach biežancaŭ. «Žyćcio Paleśsia» vyjhrała respublikanski konkurs na aśviatleńnie hetaj temy, ahułam u sieryi pavinna vyjści vosiem repartažaŭ. Pa słovach Łarysy Čornaj, nijakich pretenzij z boku AAN da publikacyi nie było.
«Spadziajusia, i redakcyja, i asabliva žurnalistka Natalla Kanoplič zrazumiejuć, što, pišučy pra padziei va Ukrainie, treba prytrymlivacca normaŭ prafiesijnaj etyki, a nie pašyrać praź biełaruskija ŚMI varjackija mify i adkrytuju manu rasiejskaj prapahandy. I nam u nijakim razie nie treba pakidać pa-za ŭvahaj takija vypadki», — miarkuje Dzianis Rabianok.
