Pa materyjałach rasśledavańnia, hetaja historyja pačynałasia zusim niavinna. Student u hety dzień pryjšoŭ u miascovuju himnaziju raźmiacca na trenažorach. U niezačynienym kabiniecie spartyŭnaj zały, dzie išoŭ ramont, jon zaŭvažyŭ dźvie pnieŭmatyčnyja vintoŭki IŽ-28. Zbroja vykarystoŭvałasia na ŭrokach pa vajennaj padrychtoŭcy. Maładomu čałavieku ničoha inšaha nie pryjšło ŭ hałavu, jak pastralać ź pnieŭmatyki praz akno himnazii. Spačatku celiŭ u ptušak, a potym — u školnikaŭ, jakija byli ŭ dvary.
U prakuratury rajona, jakaja padtrymlivała dziaržaŭnaje abvinavačvańnie ŭ pracesie, raspaviadajuć pra chod padziej:
«Adna kula trapiła padletku ŭ nahu, ale adskočyła, pakinuŭšy tolki siniak. A voś druhaja trapiła inšamu školniku ŭ kalena, zachrasnuŭšy ŭ im».
Paciarpiełaha špitalizavali. Kab dastać kulu z kalennaj čašački, chłopca daviałosia vieźci ŭ adnu z klinik Homiela. Studenta zatrymali. Razhledzieŭšy materyjały kryminalnaj spravy, rajonny sud pryznaŭ jaho vinavatym u asabliva złosnym chulihanstvie.
Pa słovach pres-sakratara Homielskaha abłasnoha suda Volhi Barsukovaj, u jakaści pakarańnia pryznačana try hady pazbaŭleńnia voli ŭ vypraŭlenčaj kałonii ŭzmocnienaha režymu. Chłopiec taksama abaviazany pakryć paciarpiełamu materyjalny i maralny ŭron na sumu zvyš 10 tysiačy rubloŭ.
Prysud pakul nie ŭstupiŭ u zakonnuju siłu. Abvinavačany maje namier jaho abskardzić.
