Za apošni čas daviałosia pačuć mnostva versij, čamu polskija ŭłady machnuli rukoj na «Biełsat» (jak raniej na Prahramu Kalinoŭskaha).
Havaryłasia, što heta było nastupstvam niejkich naradaŭ z udziełam biełaruskich analitykaŭ. Časta śćviardžałasia, što heta vynik zmovy ciapierašniaha ŭładnaha polskaha lahiera z Kramlom.
Hučali krytyčnyja hałasy, što hety krok abumoŭleny nizkaj efektyŭnaściu samoha prajektu. Padkreślivałasia novaja hieapalityčnaja sytuacyja paśla napadu Rasiei na Ŭkrainu ŭ 2014.
U hetych acenkach, mahčyma, i jość dola praŭdy, ale na maju dumku jany ihnarujuć asnoŭnuju pryčynu: poŭny kalaps apazycyi (demsiłaŭ) na apošnich prezydenckich vybarach.
Pazirajučy zvonku, vybary i ich vynik pakazvali, što demakratyčna aryjentavanaja mienšaść u krainie zmarhinalizavanaja i nia zdolnaja zajavić pra svajo miesca ŭ publičnaj prastory.
Sami demakratyčnyja palityki raźjadnanyja, i miesca kandydata ad demsiłaŭ zajmaje čysta techničny persanaž, čyja najaŭnaść lišni raz vypuklaje kiravanaść i imitacyjnaść hetaha palityčnaha pracesu.
I «Biełsat», i Prahrama Kalinoŭskaha byli stvoranyja idealistyčna nastrojenymi polskimi palitykami paśla ŭzdymu, jakoha dabiŭsia Milinkievič u 2006, u znak salidarnaści z tymi, chto advažyŭsia na pratest. Vybary 2015 hodu zaśviedčyli, što na pratest biełarusy ŭžo niazdolnyja. Akurat heta, a nie sacyjalahičnyja apytańni i kolkaść prahladaŭ na Jutubie, vyrazna pakazała: u krainie adsutničaje subjekt, varty salidarnaści, kłopatu i investycyj.
Kali biełarusam i tak dobra, dyk navošta im «Biełsat»?
